विराटनगर । मोरङको सुन्दरहरैंचा नगरपालिकामा श्रीमानले श्रीमतीको वीभत्स हत्या गरेका छन् ।
सुन्दरहरैंचा-१० बाघझोडाका ५८ वर्षीय लक्ष्मण नेपालले आफ्नी श्रीमती ४१ वर्षीया पवित्रा फुयाँल नेपालको हत्या गरेका हुन् ।
मोरङ प्रहरीका प्रवक्ता प्रहरी नायब उपरीक्षक ज्ञानेन्द्रबहादुर बस्नेतका अनुसार लक्ष्मणले आइतबार बिहान ११ बजेतिर खुकुरीले श्रीमतीको शरीरका विभिन्न भागमा अन्धाधुन्ध प्रहार गरेका थिए ।
खुकुरी प्रहारबाट पवित्राको टाउको, अनुहारलगायत शरीरका विभिन्न भागमा गहिरो चोट लागेको थियो ।
श्रीमानको खुकुरी प्रहारबाट गम्भीर घाइते भएकी पवित्राको विराटनगरस्थित नोबेल शिक्षण अस्पतालमा उपचारका क्रममा १२ बजेतिर मृत्यु भएको हो ।
लक्ष्मणले आफ्नी दोस्री श्रीमती पवित्रालाई १६ धुर जग्गा दिएर आफ्नो माया देखाएका थिए। तर समयसँगै उनीहरूको सम्बन्धमा दरार आउन थाल्यो ।
विवाद बढ्दै गएपछि पवित्रा आफ्नो माइती लेटाङ फर्किएकी थिइन् । दुवैले एक अर्काविरुद्ध अदालतमा मुद्दा हाले ।
तर न्यायाधीशको मध्यस्थतामा उनीहरूले मिलेर बस्ने निर्णय गरे । जग्गा दुवैको नाममा राख्ने सहमति भयो र मुद्दा फिर्ता लिइयो ।
तर फेरि झगडा सुरु भयो र पवित्रा माइत गइन् । आइतबार बिहान लक्ष्मणले पवित्रालाई फोन गरे र घर फर्काए । उनीहरूले सँगै खाना खाने योजना बनाए ।
खाना खाने बेलामा लक्ष्मणले अचानक खुकुरी निकाले र पवित्रामाथि आक्रमण गरे ।
पवित्राको मृत्युपछि प्रहरीले लक्ष्मणलाई पक्राउ गरेको छ । उनले आफूले गरेको अपराध स्वीकार गरेको प्रहरीले जनाएको छ ।
