विराटनगर । मोरङको सुन्दरहरैंचा नगरपालिका-७ ठडियामा कारको ठक्करबाट एक पैदल यात्रीको मृत्यु भएको छ ।
शनिबार राति पूर्व-पश्चिम राजमार्गमा गछियाबाट विराटचोकतर्फ आउँदै गरेको को १ च ५८७३ नम्बरको कारले पैदल हिँड्दै गरेका भारतीय नागरिकलाई ठक्कर दिएको थियो ।
दुर्घटना राति करिब १०:५० बजे भएको प्रहरीले जनाएको छ ।
दुर्घटनामा गम्भीर घाइते भएका भारतको असाम राज्य, छिराङ जिल्ला, बोडोल्याड निवासी अन्दाजी ५०-५५ वर्षीय हुपेनर कठेटको उपचारको क्रममा कोशी अस्पताल विराटनगरमा मृत्यु भएको छ ।
उनको टाउको र शरीरका विभिन्न भागमा चोट लागेको थियो ।
कार चालक झापा जिल्ला, दमक नगरपालिका-१३ का ३० वर्षीय सुजन थापालाई प्रहरीले नियन्त्रणमा लिएको छ ।
दुर्घटनाको समयमा कारको गति तीव्र रहेको बताइएको छ । चालकको मादक पदार्थ सेवन र सवारी चालक अनुमतिपत्रको अवस्था तत्काल खुल्न नसकेको प्रहरीले जनाएको छ ।
घटनाको थप अनुसन्धान भइरहेको प्रहरीले जानकारी दिएको छ ।
