विराटनगर । आर्थिक संकटले घेरेपछि दाङको राप्ती गाउँपालिका–८ का वडाध्यक्ष चन्द्रबहादुर गुरुङ रोजगारीका लागि विदेश पलायन भएका छन् ।
विसं २०७९ को स्थानीय तह निर्वाचनमा वडाध्यक्षमा निर्वाचित गुरुङ साउन २० गते रोजगारीका लागि बेलायत गएका हुन् ।
निर्वाचनअघि गुरुङ सोही वडामा कार्यालय सहयोगीका रूपमा कार्यरत थिए । कार्यालय सहयोगी भएर काम गर्दा मतदाताको मन जितेर उनी वडाध्यक्षमा निर्वाचित भएका थिए । कार्यालय सहयोगीबाट वडाध्यक्षमा निर्वाचित गुरुङले निकै चर्चा पाएका थिए ।
अहिले पनि उनको काम गराइप्रति नागरिकको विश्वास कायमै छ । उनले एकाएक वैदेशिक रोजगारीको यात्रा थालेपछि भने वडावासी आश्चर्यमा परेका छन् । वडा सदस्यहरू पनि अल्मलिएका छन् ।
वडा सचिवले गर्ने कामदेखि सेवाग्राहीको निवेदन लेखिदिनेसम्मका सबै काम उनी आफैँ गर्थे । तर, आर्थिक संकटले घेरेपछि वैदेशिक रोजगारीलाई रोज्नु परेको उनीकी श्रीमती संगीता गुरुङ बताउँछिन् ।
वडाध्यक्षका रूपमा उनले मासिक ३० हजार रुपियाँ सेवा सुविधा पाउँदै आएका थिए ।
‘आमा लामो समयदेखि बिरामी हुनुभयो । उहाँको उपचारमा धेरै रकम खर्च भयो । ऋण पनि लाग्यो, यहाँ बसेर तिर्न सक्ने अवस्था नभएपछि विदेश जानुभयो,’ संगीताले भनिन् ।
वडाध्यक्ष गुरुङका बुबा नीमबहादुर गुरुङ बेलायतको सेवानिवृत्त सेना थिए । बुबाको मृत्युपछि बेलायत सरकारले निवृत्त भएका सेनाका छोराछोरीलाई रोजगार दिने व्यवस्था गरेका कारण उनी पनि विदेश गएका हुन् ।
हाल कार्यवाहक अध्यक्षको जिम्मेवारी वडा सदस्य चम्फा पुनले समाल्दै आएकी छन् ।
