विराटनगर । सुनसरी जिल्लाको हरिनगर गाउँपालिका-७ मा मोटरसाइकल दुर्घटना हुँदा पाँच जना बालबालिका घाइते भएका छन् ।
सुनसरीमा एउटै मोटरसाइकलमा चालकसहित ६ जना चढेपछि भएको दुर्घटनामा एक बालिका गम्भीर घाइते भएकी छन् भने अरू चार जना घाइते भई उपचाररत छन् ।
हरिनगर-७ स्थित भुजा मिलनजिकै भित्री पक्की सडकमा हिजो दिउँसो करिब ३:५० बजे उक्त दुर्घटना भएको थियो ।
स्थानीय नेशनल आइडियल स्कुलबाट बच्चाहरूलाई घर लैजाने क्रममा स४प १३७८ नम्बरको १२५ सिसी मोटरसाइकल अनियन्त्रित भई दुर्घटना भएको प्रहरीले जनाएको छ ।
घाइतेहरूमध्ये ६ वर्षीया सजिया खातुनको अवस्था गम्भीर रहेको र उनी बोल्न नसक्ने अवस्थामा रहेको बताइएको छ ।
मोटरसाइकल चालक हरिनगर-७ का १८ वर्षीय एफुजुल्ला मियाँ, पछाडि सवार १७ वर्षीय हेजेतुल्ला मियाँ, १० वर्षीय ईदायक तुल्ला मियाँ, आठ वर्षीया हुजा खातुन घाइते भएका छन् ।
सबै घाइतेहरूलाई उपचारका लागि विराटनगरस्थित गोल्डेन अस्पतालमा लगिएको छ । प्रहरीले मोटरसाइकललाई नियन्त्रणमा लिएको र थप अनुसन्धान जारी रहेको जनाएको छ ।
प्रारम्भिक अनुसन्धानबाट यो दुर्घटना ट्राफिक नियम उल्लंघनका कारण भएको हुनसक्ने देखिएको छ ।
