विराटनगर । कोशी प्रदेशमा साउन दोस्रो सातासम्ममा धान रोपाइँ करिब-करिब अन्तिम चरणमा पुगेको छ ।
उद्योग, कृषि तथा सहकारी मन्त्रालयका प्रवक्ता पशुपति पोखरेलले साउन १८ गतेसम्मको तथ्यांकअनुसार ९५.१ प्रतिशत धान रोपाइँ भएको जानकारी दिए ।
उनका अनुसार धान उत्पादन हुने कुल क्षेत्रफलको ९५.१ प्रतिशत क्षेत्रफलमा रोपाइँ सम्पन्न भएको हो । यो समयसम्मको आँकडा हेर्दा अघिल्लो वर्षको भन्दा धेरै रोपाइँ हो ।
अघिल्लो वर्ष साउनको दोस्रो सातासम्ममा ९०.५२ प्रतिशत रोपाइँ भएको प्रवक्ता पोखरेलले शब्द एक्सप्रेसलाई जानकारी दिए ।
कोशी प्रदेशमा दुई लाख ७६ हजार ३८६.७२ हेक्टर क्षेत्रफलमा धान खेती हुँदै आएको छ । त्यसमध्ये अहिलेसम्म दुई लाख ६२ हजार ६०४.४६ हेक्टर क्षेत्रफलमा रोपाइँ सकिएको हो ।
प्रदेशको तराईका जिल्लामा ९६.६० प्रतिशत, मध्यपहाडमा ९१ प्रतिशत र उच्च पहाडमा ९२.७१ प्रतिशत स्थानमा रोपाइँ भएको छ ।
ताप्लेजुङमा पाँच हजार ६६६.३३ हेक्टर क्षेत्रफलमा धान खेती हुने गरेकोमा नियमित वर्षा हुँदा ९६.५० प्रतिशत क्षेत्रफलमा रोपाइँ भएको छ ।
आठ हजार ४९२.६३ हेक्टर क्षेत्रफलमा सङ्खुवासभामा धान खेती हुँदै आएकोमा ९० प्रतिशत क्षेत्रफलमा रोपाइँ भएको निर्देशनालयले जनाएको छ ।
त्यस्तै सोलुखुम्बुमा एक हजार २२५ हेक्टरमा धान खेती हुँदै आएकोमा ९३.९९ प्रतिशत रोपाइँ भएको छ ।
पाँचथर जिल्लामा पाँच हजार ८४८.९६ हेक्टरमा धान खेती हुने गरेकोमा साउन १७ सम्म ८८ प्रतिशत क्षेत्रफलमा मात्रै रोपाइँ भएको छ ।
इलाममा ११ हजार ६२.६४ हेक्टरमा धान खेती हुने गरेकोमा समयमा वर्षा र मल पाएकाले ९५ प्रतिशत क्षेत्रफलमा रोपाइँ भएको छ ।
१२ हजार ५० हेक्टर क्षेत्रफलमा धान खेती गरिने भोजपुरमा ९० प्रतिशत क्षेत्रफलमा रोपाइँ भएको कृषि विकास निर्देशनालय कोशी प्रदेशले जनाइएको छ ।
तेह्रथुममा छ हजार ६१५ हेक्टरमा धान खेती गरिँदै आएकोमा ८० प्रतिशतमा मात्रै रोपाइँ भएको छ ।
चार हजार ९३८.८९ हेक्टर क्षेत्रफलमा धान खेती हुने धनकुटामा मकै भित्र्याउने क्रम चलिरहेकाले ८१ प्रतिशत क्षेत्रफलमा मात्रै रोपाइँ भएको छ ।
उदयपुरमा १३ हजार ३८०.०५ हेक्टर क्षेत्रफलमा धान खेती गरिँदै आएको छ, जसमध्ये समयमा वर्षा हुँदा यहाँको ९६ प्रतिशत क्षेत्रफलमा रोपाइँ भएको छ ।
ओखलढुङ्गामा ९२ प्रतिशत क्षेत्रफलमा मात्रै रोपाइँ भएको छ ।
झापा र मोरङमा अधिकतर स्थानमा धान रोपाइँ भएको छ । झापामा ९६.३३ र मोरङमा ९८ प्रतिशत क्षेत्रफलमा रोपाइँ भएको छ ।
त्यस्तै सुनसरीमा पनि करिब ९५ प्रतिशत क्षेत्रफलमा रोपाइँ भएको छ । कोशी प्रदेशमा कुल खेतीयोग्य क्षेत्रफल आठ लाख २६ हजार ६४६ रहेको छ ।
