चितवन। पहिरोमा परी त्रिशुली नदीमा खसेर दुईवटा बस बेपत्ता हुँदा बसमा सवार ६५ जना यात्रुसमेत बेपत्ता भएका छन्।
प्रहरीका अनुसार शुक्रबार बिहान ३ बजेको समयमा भरतपुर महानगरपालिका-२९ सिमलताल भन्ने ठाउँमा अविरल वर्षाका कारण ठूलो पहिरो झरी वीरगन्जबाट काठमाडौँ जाँदै गरेको विङर गाडी र काठमाडौँबाट गौरतर्फ आउँदै गरेको गणपति डिलक्स बस त्रिशूली नदीमा खसेका हुन्।
वीरगन्जबाट आएको गाडीमा २४ जना र गणपति डिलक्समा ४१ जना यात्रु गरी ६५ जना सवार रहेको जानकारी प्राप्त भएको छ । यात्रुको अवस्थाबारे विस्तृत विवरण आउन बाँकी छ।
उक्त स्थानमा सशस्त्र प्रहरी बल नेपाल नं. १७ गण चितवनबाट बाट ३५ जना र बिपद ब्यबस्थापन तालिम शिक्षालयबाट ७ जना गोताखोर सहित २० जना परिचालन भएका छन्। साथै अहिले मुग्लिन नारायणगढ सडक अबरुद्ध रहेको जानकारी सशस्त्र प्रहरीले दिएको छ।
ढुंगा खस्दा बस चालकको मृत्यु
यसैगरी, असार २८ गते बिहान ३ बजे चितवन जिल्ला भरतपुर-२९ सत्रकिलो स्थित नारायणगढ–मुग्लिन सडक खण्डमा ढुंगा खस्दा बसचालकको मृत्यु भएको छ।
बुटवलबाट काठमाण्डौँतर्फ जाँदै गरेको लु २ ख ६५६६ नं.को बसलाई अचानक माथिबाट लेदोसहितको ढुंगा खसेर बसमा लाग्दा बस चालक नवलपरासीको सुनवल नगरपालिका–४ बस्ने ३६ वर्षीय मेगनाथ बिकको मृत्यु भएको हो।
दुर्घटनामा गम्भीर घाइते भई उपचारका लागि भरतपुरतर्फ पठाएकोमा उपचारको क्रममा उनको मृत्यु भएको प्रहरीले जनाएको छ।
बस घटनास्थलमै रहेको बसमा सवार यात्रुहरूलाई केही नभएको जानकारी सशस्त्र प्रहरीले दिएको छ।
बाटो एकतर्फ अवरोध भएको उक्त स्थानमा सशस्त्र प्रहरी बल नेपाल नं. १७ गण चितवनबाट २० जनाको टोली र नेपाल प्रहरी परिचालन भएको छ।
बाटो खुलाउन सडक डिभिजनसँग समन्वय भइरहेको जानकारी डिएसपी शैलेन्द्र थापाले दिए।
