विराटनगर । विराटनगरमा दुई समूहबीच भएको ‘ग्याङ फाइट’मा एक युवकको मृत्यु भएको छ। घटनामा संलग्न चार जनालाई प्रहरीले पक्राउ गरेको छ।
मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार, सोमबार राति १० बजेतिर विराटनगर-२ स्थित सेन्ट जोसेफ मोडमा दुई पक्षबीच झडप भएको थियो।
झडपमा घाइते भएका कटहरी गाउँपालिका-१ का २१ वर्षीय करण कामतको उपचारका क्रममा कोशी अस्पतालमा मृत्यु भएको हो।
घटनामा अन्य दुई जना – २२ वर्षीय विक्रम मण्डल र १७ वर्षीय अमन राय – पनि घाइते भएका छन्। उनीहरूलाई थप उपचारका लागि नोबेल शिक्षण अस्पताल लगिएको छ।
प्रहरीले घटनामा संलग्न चार जनालाई पक्राउ गरेको छ। पक्राउ पर्नेहरूमा २० वर्षीय सोनु गिरी, १८ वर्षीय निमदावा शेर्पा, २० वर्षीय सञ्जय गिरी र १६ वर्षीय एक बालक रहेका छन्।
प्रारम्भिक अनुसन्धानबाट केटी जिस्काएको विषयलाई लिएर विवाद भएको र त्यसपछि दुई समूहबीच झडप भएको खुलेको छ। घटनामा प्रयोग गरिएको कैंची बरामद गरिएको छ।
डीएसपी बस्नेतले घटनाका सम्बन्धमा थप अनुसन्धान भइरहेको र संलग्नविरुद्ध कर्तव्य ज्यान मुद्दा चलाइने जानकारी दिए। उनले भने, “घटनामा अरु पनि संलग्न छन् कि भनेर अनुसन्धानको दायरा फराकिलो पारिएको छ।”
