विराटनगर । राठी ग्रुपको एक प्रमुख उत्पादन ‘राठीकोल’को ब्रान्ड एम्बासडरमा अभिनेता राजेश हमाल नियुक्त भएका छन् ।
महानयकका रूपमा परिचित हमाल र राठी ग्रुपका अध्यक्ष अरुणकुमार राठीबीच मंगलबार सम्झौता पत्रमा हस्ताक्षर भएको हो ।
सम्झौताअनुरूप हमालले अबको एक वर्षसम्म ‘राठीकोल’का विभिन्न विज्ञापनहरूमार्फत् यसको प्रचार गर्नेछन् ।
कार्यक्रममा बोल्दै राठी ग्रुपका अध्यक्ष राठीले ‘राठी’ ब्रान्डले चलचित्रमा हमालको उत्कृष्ट विरासतलाई सदैव सम्मान गर्ने बताए ।
हमाललाई ब्रान्ड एम्बासडरको रूपमा स्वागत गर्दै उनले यो सहकार्यले नेपाली चलचित्र र समाजको लागि महानायकको प्रतिबद्धता र ‘राठिकोल’को उत्कृष्टताको प्रतिबद्धतासँग उत्तम रूपमा मेल खाने विश्वास व्यक्त गरे ।
राठीकोल गुणस्तरीय चिपकने पदार्थ (एढेसिभ) उत्पादन गुणस्तरको हिसाबमा पनि पहिलो र उत्पादनको हिसाबमा पनि पहिलो रहेको बताउँदै उनले पछिल्लो समय यो उत्पादनलाई लाखौँ कालिगडहरूले विश्वास गरेर प्रयोग गरिरहेको सुनाए ।
‘हजारौँ बिक्रेताहरूले बेचिरहेका छन्, विगत ३५ वर्षदेखि निरन्तर प्रयोग हुनु भनेको सानो कुरा होइन । विदेशी कम्पनीहरूको उत्पादनले लिएको बजारको प्रतिस्पर्धामा हामीले राठीकोललाई स्थापित गर्न सक्षम भएका छौँ,’ उनले भने ।
उनले राठीकोल नेपालको हिमालदेखि तराईसम्मका सबै मौसमहरू र जुनसुकै तापक्रममा उपयुक्त हुने उनको भनाइ थियो ।
अभिनेता हमालले ‘राठीकोल’लाई ‘नेसनल प्राइड’ को रूपमा सम्बोधन गर्दै नेपालमा यो गुणस्तरको उत्पादन हुनु सबै नेपालीको लागि गर्वको कुरा रहेको बताए ।
राठीकोलका सिइओ योगेश राठीले हमालको चलचित्र यात्रा र राठीकोलको उत्पादनको यात्रा बराबर ३५ वर्ष रहेको उल्लेख गर्दै निरन्तर सहकार्यमा रहने उनको भनाइ छ ।
राठी ग्रुपको इतिहास एक सय ३० वर्ष पुरानो रहेको र सामान्यतया स्विच, केबल, बल्ब, हार्डवेयर र राठीकोलका लागि चिनिँदै आएको छ ।
‘राठीकोल’ राठी ग्रुपको एक प्रमुख उत्पादनमध्ये एक हो । यसको उत्पादन मुख्यतया फर्निचर बनाउने काममा प्रयोग हुने काठको कामका लागि प्रयोग हुन्छ ।
