विराटनगर । मोरङको रतुवामाई नगरपालिमा विदेश जानका लागि अचम्मको प्रपञ्च रचिएको पाइएको छ ।
रतुवामाई-७ नम्बर वडाका पवन लिम्बूले विदेश जानका लागि जीवित बुबाको मृत्यु दर्ता गरेर आमाको अर्कैसँग विवाह दर्ता गराएका हुन् ।
पवनले जीवित बुबा जितबहादुर लिम्बूको मृत्यु भएको भनी घटना दर्ता गराएर आमा होमादेवी लिम्बूलाई पदमबहादुर लिम्बूसँग विवाह दर्ता गराएका हुन् ।
पवनले २०८१ वैशाख २३ गते जितबहादुर लिम्बूको मृत्यु भएको भनी वडा कार्यालयमा निवेदन दिएका थिए । सोही दिन होमादेवी लिम्बू सूचक भएर छोरा विपन सुब्बा लिम्बूको जन्मदर्ता प्रमाणपत्र लिइएको देखिन्छ ।
जितबहादुर र होमादेवी दम्पती हुन् । तर सोही होमादेवी लिम्बू दुलही र पदमबहादुर लिम्बू दुलाहा भएर निजहरूले विवाह दर्ता प्रमाणपत्रसमेत लिएका छन् ।
विवाह दर्तामा होमादेवीका श्रीमानको नाम पदमबहादुर लिम्बू भए पनि मृत्यु दर्तामा भने जितबहादुर लिम्बू उल्लेख छ ।
विवाह दर्ता र मृत्यु दर्तामा नाम फरक भए पनि जितबहादुर र पदमबहादुरको नागरिकता नम्बर भने एउटै (७५६४–२६३) नै छ ।
अझ रोचक पक्ष के छ भने विवाह दर्तामा पदमबहादुरको बाबुको नाम शेरबहादुर लिम्बू छ भने मृत्यु दर्तामा सिंहबहादुर लिम्बू छ ।
यस विषयमा सोध्दा रतुवामाई नगरपालिकाका प्रवक्ता भुलबहादुर कार्कीले वास्तविकता छानबिन गरी कारबाही अगाडि बढाइने बताए ।
वडा सचिव सरोज ढकालले तीनवटै दर्ता प्रक्रिया अगाडि बढाएकाले यसको छानबिन हुने नगरपालिकाले जनाएको छ ।
यस्ता घटना हङकङ, बेलायत, अमेरिकालगायतका स्थानमा विदेसिनका लागि हुने गरेको पाइन्छ । आर्थिक प्रलोभनमा परेर कर्मचारीहरूले जथाभाबी कागजात बनाइदिने गरेको पाइन्छ ।
सरकारले वास्तविक विवरणसहितको राष्ट्रिय परिचयपत्र दिन सुरु गरेसँगै यस्ता फर्जी र नक्कली घटनाहरू बाहिरिन थालेको छ भने कागजात मिलाउन उनीहरूलाई समस्या पर्ने गरेकाले सम्पर्कविहीन हुने गरेको स्थानीयको आरोप छ ।
