विराटनगर । मोरङको विराटनगरमा मोटरसाइकलले ठक्कर दिँदा सिटीसफारीमा सवार दुई महिलासहित तीन जना घाइते भएका छन् ।
बुधबार साँझ ५:४० बजेतिर विराटनगर महानगरपालिका-४ औषधि विभागअगाडि कोशी लोकमार्गमा मोटरसाइकलले सिटीलाई ठक्कर दिएको थियो ।
आयल निगमबाट ढाटतर्फ जाँदै गरेको प्र १-०२-०४७ प १३९ नम्बरको मोटरसाइकलले बाटो क्रस गर्दै गरेको प्र १-०२-००४ ह ०८२३ न.को सिटी सफारीलाई ठक्कर दिएको हो ।
उक्त दुर्घटनामा सिटीमा सवार रहेकी विराटनगर-५ बस्ने ३३ वर्षीया दीपा श्रेष्ठ र सोही स्थानकी ३७ वर्षीय रस्मी घिमिरे घाइते भएकी हुन् ।
घाइते दुवै जनाको विराट नर्सिङहोम, विराटनगरमा उपचार भइरहेको प्रहरीले जनाएको छ ।
यसैगरी, मोटरसाइकलमा पछाडि सवार सुन्दरहरैंचा नगरपालिका-६ बस्ने ३७ वर्षीय निलकण्ठ राईको ओठ काटिएको छ ।
उनको विराटनगरस्थित नोबेल अस्पतालमा उपचार भइरहेको प्रहरीले जनाएको छ ।
सिटी चालक बूढीगंगा गाउँपालिका-१ का अन्दाजी ३५ वर्षीय प्रकाश घिमिरे र मोटरसाइकल सुन्दरहरैंचा-६ बस्ने अन्दाजी ३२ वर्षीय अम्बरबहादुर लिम्बु उपचारमा संलग्न रहेका छन् ।
मोटरसाइकल तीव्र गतिमा कुदाएका कारण दुर्घटना भएको प्रहरीको प्रारम्भिक अनुसन्धानमा उल्लेख गरिएको छ ।
