विराटनगर । जनप्रतिनिधिको रूपमा दिनरात खटिने वडाध्यक्ष अहिले माध्यमिक शिक्षा परीक्षा (एसइई) मा सहभागी भएका छन् ।
बाँकेको खजुरा गाउँपालिका-५ का वडाध्यक्ष गरिबे शेष ५० वर्षको उमेरमा एसइईमा सहभागी भएका हुन् ।
शेष २०८० सालको परीक्षामा सहभागी भएका हुन् । ज्ञानोदय माध्यमिक विद्यालय खजुराको खुला शिक्षाअन्तर्गत जनता मावि परीक्षा केन्द्रबाट शेष परीक्षामा सहभागी भएका हुन् ।
एसइईमा राम्रो तयारीका लागि उनले वडामा सदस्यलाई कार्यवाहक अध्यक्षको जिम्मेवारी दिएका छन् ।
पहिले अभिभावकले धार्मिक शिक्षा पढाए पनि आफूलाई औपचारिक शिक्षा पढ्न मन लागेका कारण एसइई दिएको उनी बताउँछन् ।
राम्रो गरेर थप उच्च शिक्षाको अध्ययन गर्ने रहर उनको छ ।
स-साना नानी बाबू परीक्षामा सहभागी भएको देख्दा आफूले बाल्यकालमा किन पढ्न पाइनँ भन्ने लागे पनि पढाइ अघि बढाउने इच्छाशक्ति भए उमेर बाधक नहुने उनको भनाइ छ ।
