बाँके । बाँकेमा श्रीमतीको हत्या आरोपमा एक पुरुष पक्राउ परेका छन् ।
पक्राउ पर्नेमा बर्दियाको बाँसगढी नगरपालिका-४ मदा घर भई बाँकेको कोहलपुर नगरपालिका-१४ पार्वतीपुरमा बस्दै आएका २२ वर्षीय अनिल विश्वकर्मा रहेका छन् ।
२१ वर्षीया श्रीमती सुशीला सुनारको हत्या गरेको अभियोगमा उनलाई पक्राउ गरिएको बाँके प्रहरीले जनाएको छ ।
बाँके प्रहरीका प्रवक्ता प्रहरी नायब उपरीक्षक नारायण डाँगीका अनुसार होम पाइप कम्पनीमा काम गरी बस्ने अनिललाई सोमबार राति पक्राउ गरिएको हो ।
इलाका प्रहरी कार्यालय कोहलपुरबाट खटिएको प्रहरीले उनलाई पक्राउ गरेको हो ।
चार सय रुपैयाँको निहुँमा श्रीमान्-श्रीमतीका बीचमा भएको विवादले उग्र रूप लिँदा अनिलले सुशीलालाई सोमबार राति ढाडमा चक्कु प्रहार गरेका थिए ।
चक्कु प्रहारपछि घाइते श्रीमतीको उपचारका लागि अनिल आफैंले राति नै नेपालगञ्ज मेडिकल कलेज शिक्षण अस्पताल कोहलपुर पुर्याएका थिए ।
उपचारका क्रममा उनलाई राति १ बजेतिर चिकित्सकले मृत घोषणा गरेका थिए ।
प्रहरीका अनुसार अनिल र सुशीलाले पाँच महिना पहिलेमात्रै विवाह गरेका थिए ।
होलीको समयमा अनिलले श्रीमती सुशीलालाई बर्दियास्थित घर जान भनेका थिए । श्रीमती नमानेपछि उनी एक्लै घर गएका थिए ।
सुशीलाले मेरो पैसा लगेर किन घरमा आफन्त भेट्न गएको भन्दै अनिललाई केरकार गर्न थालेपछि उनले आवेगमा आएर चक्कुले ढाडमा हानेका थिए ।
चक्कु प्रहारबाट गम्भीर घाइते सुशीलाको समयमै अस्पताल नपुर्याउँदा अत्यधिक रक्तस्राव कारण मृत्यु भएको जानकारी अस्पतालले प्रहरीले जनाएको छ ।
घटनाबारे थप अनुसन्धान हुन बाँकी रहेको प्रहरीले बताएको छ ।
