विराटनगर । सुदूरपश्चिम प्रदेशको प्रवेशद्वराका रुपमा रहेको चिसापानीस्थित कर्णाली नदीको पुलबाट सोमबार १७ जना युवाले हाम फालेका छन् ।
लम्कीचुहा नगरपालिका-३ चिसापानीका स्थानीय युवाको समूह दिउँसो सँगै होली खेलेर साँझ करिब ५ बजे पुलबाट हामफालेर नुहाउन पुलबाट हाम फालेको हुनसक्ने इलाका प्रहरी कार्यालय चिसापानीले जनाएको छ ।
मदिरा सेवन गरी नांगै हिँडेका युवालाई प्रहरीले रोक्न खोज्दा आफूहरू स्थानीय भएको र पुलमा तस्बिर खिच्ने बताउँदै अटेर गरी गएको जनाइएको छ ।
एकपछि अर्को हाम फालेकामध्ये एक जना डुबेर बेपत्ता भएका छन् । बेपत्ता हुनेमा लम्कीचुहा नगरपालिका ३ चिसापानीका ३० वर्षीय लोकेन्द्र शाही छन् ।
कञ्चनपुर बेलौरी नगरपालिका-१ बैशाखीका शाही चिसापानीमा व्यवसाय गर्दै आएका थिए ।
आज बिहानैदेखि स्थानीय र प्रहरीले खोजी कार्य सुरु गरेको कैलाली प्रहरी प्रमुख पदम विष्टले बताएका छन् ।
जनपद प्रहरी र सशस्त्रप्रहरीले घटनाको बारेमा खोजी अनुसन्धान गरिरहेको जनाउँदै मंगलबार गोताखोर टोलीले वेपत्ता शाहीको खोजी गर्ने उनलर् जानकारी दिएको छ ।
गत वर्षसमेत पुलबाट हाम फालेर पौडिने होडबाजीमा डुबेर युवाको निधन भएको थियो ।
