विराटनगर । संयुक्त राज्य अमेरिकामा अध्ययनरत एक नेपाली छात्राले अमेरिकाको उच्चतम अनुसन्धान केन्द्रमा अनुसन्धान र विश्लेषणका लागि अवसर पाएकी छन् ।
मोरङको सुन्दरहरैंचा नगरपालिकाकी एन्जिला बस्तीले नेसनल एरोनटिक्स एन्ड स्पेस एडमिनिस्ट्रेसन (नासा)मा काम गर्न अनुसन्धान वृत्ति पाएकी हुन् ।
वासिङ्टन स्टेट युनिभर्सिटीमा स्नातक तेस्रो तहमा अध्ययनरत एलिनाले अमेरिकाको मात्र नभई विश्वकै अन्तरिक्ष अनुसन्धान केन्द्रका रूपमा रहेको नासामा अनुसन्धान गर्ने अवसर पाएकी हुन् ।
अध्ययनकै क्रममा नासाका वैज्ञानिकहरूसँग सौर्य ऊर्जा प्रणालीको चुम्बकीय तथा प्लाज्मा अध्ययनका लागि अन्तरिक्ष अभियानको क्रममा प्राप्त तथ्यांकको विश्लेषण कार्यमा उनले सहकार्य गर्ने छिन् ।
युनिभर्सिटी स्पेस रिसर्च एसोसिएसनका तर्फबाट गरिएको मनोनयनमा उनका नासाका प्रायोजक र अनुसन्धानका निरीक्षक डा. जिना डिब्रासियो र डा. नोर्बेत्रो रोमानेल्ली रहेका छन् ।
उनलाई सन् २०२४ मे ६ देखि २०२४ जुलाई १९ सम्मका लागि अनुसन्धानमा लगाउन लागिएको हो ।
उनको काम पूर्णकालीन अनुसन्धाता नभई स्नातक अध्ययनरत विद्यार्थीका रूपमा नै हुने छ ।
त्यसका लागि नासाले नै उनलाई छात्रवृत्ति प्रदान गरेको युनिभर्सिटी स्पेस रिसर्च एसोसिएसनका तर्फबाट निर्देशक लिन्डा पार्करले उनलाई दिएको पत्रमा उल्लेख छ ।
धनकुटाको फलाँटेका बस्ती परिवारमा जन्मेकी एन्जिलाले काठमाडौंस्थित बुढानीलकण्ठ स्कुलबाट एसइई उत्तीर्ण गरेकी हुन् ।
उनका पिता तुलसीप्रसाद बस्ती मितेरी बैंकमा कार्यकारी प्रमुख र माता कोपिला निरौला पूर्वशिक्षिका हुन् ।
एन्जिलाले सुनसरीको धरानस्थित दिल्ली पब्लिक स्कुलबाट कक्षा १२ पूरा गरी उच्च अध्ययनका लागि अमेरिका गएकी थिइन् ।
उनको खगोल विज्ञानप्रतिको विद्यालय शिक्षाको बेलादेखि नै हो ।
एन्जिलाले सन् २०२२–२०२३ मा डिनलिस्ट छात्रवृत्ति, सन् १९१९ मा रोबोटिक्स प्रतिस्पर्धामा काम गरेकी थिइन् ।
युनिभर्सिटी अफ कोलोराडोमा एरोस्पेस इन्जिनियरिङ अध्ययन गर्दै गर्दा उनको रुचि खगोल विज्ञानतर्फ मोडिएको थियो ।
त्यसयता आफूले विश्वविद्यालय नै परिवर्तन गरी वासिङ्टन स्टेट युनिभर्सिटीमा खगोल विज्ञानको सिद्धान्त र गणित अध्ययन थालेको उनले बताइन् ।
उनी अहिले विश्वविद्यालयमा नै प्राध्यापकको सहायकका रूपमा कार्यरत छिन् ।
अध्ययनका क्रममा नै एउटा विश्व वैज्ञानिक सम्मेलनमा नोबेल पुरस्कार प्राप्त भौतिक शास्त्रीहरूसहित नासाका वैज्ञानिकसँग भेट भएर आफ्नो रुचि क्षेत्र बताएपछि अहिलेको अवसरको बाटो खुलेको बताइन् ।
नासामा आफूलाई ब्ल्याक होलबारे अध्ययन गर्ने चासो रहे पनि त्यो चौथो वर्षमा मात्र सम्भव हुने भएको जानकारी दिइन् ।
अमेरिकाका विश्वविद्यालयमा अन्य विद्यार्थीभन्दा उच्च अंक ल्याए पनि नासाको नियमअनुसार आफूले अध्ययन अनुसन्धानको अवसर नपाउने कुरा नासाका वैज्ञानिकद्वय डा. जिना डिब्रासियो र डा. नोर्बेत्रो रोमानेल्लीलाई बताएका थिए ।
त्यसपछि उनीहरूले आफ्नातर्फबाट केही पहल गर्ने आश्वासन दिएको स्मरण गर्दै अहिले त्यहीअनुसार काम पाएको एन्जिलाको भनाइ छ ।
नासाका वैज्ञानिकलाई आफूले भनेपछि विभिन्न चरणका जुम बैठकमा परीक्षण गरेर मात्र आफूलाई चयन गरिएको जानकारी पनि एन्जिलाले दिइन् ।
उनले मंगल र वृहस्पति ग्रहका तथ्यांकको विश्लेषणमा वैज्ञानिकहरूसँगको समूहमा काम गर्ने बताइन् ।
