विराटनगर । मोरङको विराटनगर महानगपालिका-१० स्थित कान्तिपुर सेकेन्डरी स्कुलले आफ्नो वार्षिकोत्सव र अभिभावक दिवस मनाएको छ ।
सोमबार विराटनगरको कंचनजंघा पार्टी प्यालेसमा एक कार्यक्रमको आयोजना गरी कान्तिपुरले वार्षिकोत्सव र अभिभावक दिवस मनाएको हो ।
वार्षिकोत्सवको अवसर पारेर स्कुलका विद्यार्थीहरूले साँस्कृतिक नृत्य प्रस्तुत गरेर उपस्थित अतिथि तथा अभिभावकहरूलाई मनोरञ्जन दिलाएका थिए ।
कार्यक्रमलाई सम्बोधन गर्ने क्रममा प्याब्सन, मोरङका अध्यक्ष प्रेमलालसिंह सुवालले पछिल्लो समय बालबालिका मोबाइल र स्क्रिनमा पल्किँदा उनीहरू मनोरोगको सिकार हुन थालेकोले अभिभावक सचेत हुनुपर्ने औंल्याए ।
हिसान मोरङ अध्यक्ष अमित ढकाल विद्यालय, विद्यार्थी र अभिभावकले त्रिकोणात्मक र समन्वयात्मक भूमिका निर्वाह गरेमा शिक्षा क्षेत्रले फट्को मार्ने बताए ।
विराटनगर महानगरका शिक्षा महाशाखा प्रमुख कृष्ण भट्टराईले शैक्षिक गुणस्तर उकास्न सबै निकायबीच एकता जरुरी रहेको सुनाए । स्थानीय तहको नियमन-अनुगमन, विद्यालयको व्यवहारिक र प्रयोगात्मक पठनशैली, विद्यार्थीको लगनशीलता र सचेत अभिभावकले शैक्षिक गुणस्तर वृद्धि गर्न सक्ने उनको भनाइ छ ।
कान्तिपुरका प्रिन्सिपल भुवन नेपालले २०७२ सालमा नयाँ व्यवस्थापन टिम आएपछि स्कुलले शैक्षिक गुणस्तरमा व्यापक सुधार गरेको बताए ।
पछिल्लो समय शैक्षिक हबका रूपमा चिनिएको विराटनगरका मात्र नभएर कोशी प्रदेशभरिका विद्यार्थीहरूका लागि कान्तिपुर अध्ययनको थलो बनेको बताउँदै उनले हाल यस विद्यालयअन्तर्गत दुई हजार ५१६ जना अध्ययनरत रहेको बताए ।
त्यस्तै, कान्तिपुरले उत्कृष्ट नतिजा हासिल गरिरहेको बताउँदै प्रिन्सिपल नेपालले अतिरिक्त क्रियाकलापमा पनि कान्तिपुर अब्बल रहेको दाबी गरे ।
जिल्ला शिक्षा समन्वय इकाई मोरङका प्रमुख टंक गौतमले अभिभावकले आफ्ना सन्ततिलाई समय दिन आवश्यक रहेको बताए । बालबालिकाको पहिलो शिक्षालय घरपरिवार नै रहेको उल्लेख गर्दै गौतमले आफ्ना छोराछोरीको भविष्य बनाउन स्कुलको मात्र भर पर्दा पुग्ने मानसिकताबाट माथि उठ्न अभिभावकलाई सुझाए ।
कार्यक्रमको सञ्चालन स्कुलका निर्देशक शंकर काफ्लेले गरेका थिए ।
