विराटनगर । गुल्मीको जिल्लाको गुल्मीदरबार गाउँपालिकाले अविवाहित नागरिकलाई सम्मान गरिएको छ ।
हालैमात्र उक्त गाउँपालिकाले बिहे नगर्ने १८ जना महिला र १६ जना पुरुष गरी ३४ जनालाई सम्मान गरिएको प्रमुख प्रशासकीय अधिकृत राजीव पन्थीले जानकारी दिए ।
उनका अनुसार आर्थिक वर्ष २०८०/०८१ को वार्षिक स्वीकृत नीति तथा कार्यक्रमअन्तर्गत उनीहरू सम्मानित भएका हुन् ।
३४ जना अविवाहित नागरिकमध्ये ३० जनालाई जनही एक हजारका दरले निर्वाह भत्तासमेत प्रदान गरिएको छ ।
सामाजिक सुरक्षा कार्यक्रम शीर्षकमा विनियोजित भएको बजेटबाट गत साउनदेखि पुससम्म ३४ जना अविवाहितलाई सम्मान गरिएको हो ।
गाउँपालिका अध्यक्ष सरोजकुमार थापाले लोककल्याणकारी राज्यको अवधारणा स्वरूप सामाजिक संरक्षणको लागि प्रयास गरिएको बताए ।
बजेटले भ्याएसम्म रकम थप गरी वितरण गरिने भन्दै आगामी दिनमा बैंक खातामा जाने व्यवस्था मिलाउने उनको भनाइ छ ।
४० वर्ष पुगेका अविवाहित महिला र ४५ वर्ष पुगेका अविवाहित पुरुषलाई सम्मानसहित सामाजिक सुरक्षा भत्ता वितरण गरिएको गाउँपालिकाले जनाएको छ ।
