विराटनगर । मोरङको ग्रामथान गाउँपालिकामा सवारीसाधनको ठक्करबाट पैदलयात्रीको मृत्यु भएको छ ।
मृत्यु हुनेमा ग्रामथान-६ का अन्दाजी ३० वर्षीय सुरज माझी रहेको प्रहरीले जनाएको छ ।
सोमबार बेलुका ९ः२० बजेतिर ग्रामथान-६ नेताचोकस्थित घिनाघाट विराटचोक सडकखण्डमा नम्बर नखुलेको सवारीसाधनले ठक्कर दिएको थियो ।
तत्काल नम्बर नखुलेको सवारीसाधनले ठक्कर दिँदा पैदल स्थानीय उम्ली माझीका सुरजको टाउकोमा गम्भीर चोट लागेको थियो ।
घाइते उनलाई उपचारका लागि विराटनगरस्थित कोशी अस्पताल ल्याइएको थियो । तर, राति १० बजेतिर उनलाई चिकित्सकले मृत घोषणा गरेको मोरङ प्रहरीले जानकारी दिएको छ ।
मोरङ प्रहरी प्रवक्ता प्रहरी नायब उपरीक्षक रन्जनकुमार दाहालका अनुसार माझीलाई ठक्कर दिएर फरार बनेको सवारी साधन खोज्ने काम भइरहेको छ ।
