विराटनगर । होस्टेलमा मृतावस्थामा फेला परेकी गोरखाकी १४ वर्षीया शालीन पोखरेल मृत्यु प्रकरणमा तीन जना पक्राउ परेका छन् ।
गोरखा जिल्ला अजिरकोट गाउँपालिका-५ मुच्चोकका दीपेन्द्र पोखरेलकी छोरी शालीनको शव चितवनको रत्ननगरमा भेटिएको थियो ।
रत्ननगर नगरपालिका-१० स्थित एकता शिशु निकेतन विद्यालयमा कक्षा-८ मा अध्ययनरत शालीन फागुन १२ गते झुन्डिएको अवस्थामा फेला परेकी थिइन् ।
सोही स्कुलले सञ्चालन गरेको होस्टेलमा शालीनको शव भेटिएपछि उनका बुबा-आमाले हत्या भएको आशंकामा जाहेरी दिएका थिए ।
सोही आधारमा विद्यालयका प्रधानाध्यापक बालहरि देवकोटा, सहायक प्रधानाध्यापक किरणबहादुर अधिकारी र छात्रावास सुपरिवेक्षक कमल शर्मा पौडेललाई प्रहरीले पक्राउ गरेको हो ।
जाहेरी परेपछि उनीहरूलाई पक्राउ गरिएको जिल्ला प्रहरी कार्यालय चितवनका डिएसपी श्रीराम भण्डारीले जानकारी दिए ।
डिएसपी भण्डारीका अनुसार पक्राउ परेका उनीहरूमाथि अनुसन्धान गर्न सात दिन हिरासतमा राख्न चितवन जिल्ला अदालतले अनुमतिसमेत दिएको छ ।
यता, शवको पोष्टमर्टमका लागि काठमाडौंस्थित महाराजगन्ज टिचिङ अस्पतालमा ल्याइएको छ ।
पोष्टमर्टम पनि भइसकेको पनि रिपोर्ट आइनसकेकाले प्रहरीको टोली काठमाडौंमै रहेको छ ।
मृतकका बुबा-आमाले भने शालीनको बलात्कारपछि हत्या भएको दाबी गरेका छन् ।
