विराट्नगर । ताप्लेजुङस्थित प्रसिद्ध तीर्थस्थल पाथीभरा (मुक्कुलुङ) मा विभिन्न ४६ देशका विदेशी मुद्रा संकलन भएको छ ।
पाथीभरा क्षेत्र विकास समितिका कार्यकारी निर्देशक प्रजिन हाङ्बाङका अनुसार अमेरिकी डलरसहित ४६ भन्दा बढी देशको विदेशी मुद्रा संकलन भएको हो ।
विदेशी मुद्रामध्ये तीन हजार ९३३ अमेरिकी डलर छ ।
सबैभन्दा बढी दक्षिण कोरियाको आठ लाख ६० हजार मुद्रा रहेको छ भने इन्डोनेसियाको १६ हजार, जापानको १४ हजार १२९, इरानको १० हजार, ओमनको नौ हजार ७४० मुद्रा रहेको छ ।
कतारको चार हजार ९२, साउदी अरबको एक हजार ७२५, भियतनामको दुई हजार चार सय मुद्रा रहेको छ भने सबैभन्दा कम विदेशी मुद्रामा लिबियाको एक र आइसल्यान्डको तीन र जोर्डनको चार रुपैयाँ रहेको छ ।
यता विदेशी मुद्रामा भारतीय रुपियाँ (भारु) भने लाखौँ परिमाणमा सङ्कलन हुने गरेको छ ।
अहिले भारतीय सिक्का गणना भइरहेको र हालसम्म चार लाख ९० हजार रुपैयाँभन्दा बढी भारु सिक्का गणना गरिसकिएको छ ।
