विराटनगर । कोशी प्रदेश प्रहरी प्रमुख प्रहरी नायब महानिरीक्षक चन्द्रकुवेर खापुङ लागुऔषध ओसारपसारतर्फ राम्रो सफलता हात पारेका छन् ।
गत माघ ३ गते कोशी प्रदेश प्रहरी प्रमुखका रूपमा हाजिरी गरेका खापुङ नेतृत्वको प्रहरीले माघ महिनायता मात्र करिब दुई हजार किलो गाँजा बरामद गरेको हो ।
प्रदेश प्रहरी प्रवक्ता प्रहरी नायब उपरीक्षक सुमन तिम्सिनाका अनुसार माघ महिनायता प्रहरीले एक हजार नौ सय १९ किलो पाँच सय ग्राम गाँजा बरामद गरेको हो ।
चालू आर्थिक वर्षको माघ महिनासम्म दुई हजार एक सय आठ किलो लागुऔषध गाँजा बरामद भएकोमध्ये डिआइजी खापुङ आइकन सो परिमाणमा गाँजा फेला पारिएको एसपी तिम्सिनाले शब्द एक्सप्रेसलाई सुनाए ।
‘हालसालै सरुवा भई यहाँ आउनुभएका प्रदेश प्रहरी प्रमुखज्यूले लागुऔषध ओसारपसार र दुर्व्यसनीविरुद्ध कडा रूपले प्रस्तुत हुनुभएको छ,’ उनले भने, ‘यसकै नतिजा हो, यो । उहाँ यो प्रदेशको पूर्ण जानकार हुनुहुन्छ, उहाँको सक्षम नेतृत्वको उपज पनि हो ।’
प्रदेशका विभिन्न जिल्लाबाट प्रहरीले माघ महिनायता दुई किलो ७९ ग्राम ब्राउन सुगर, २७ हजार ६ सय १८ थान विभिन्न मनोद्विपक चक्की पनि बरामद गरेको छ ।
सो अवधिमा एक सय २३ वटा मुद्दा गरेको प्रहरीले एक सय ९१ जनालाई पक्राउ गरेको छ ।
अघिल्लो आर्थिक वर्षमा यो प्रदेशमा पाँच हजार आठ सय १५ किलो गाँजा बरामद भएको थियो ।
प्रहरीले गाँजालगायत लागुऔषधसहित चालू आर्थिक वर्षको माघसम्ममा ७५८ जनालाई पक्राउ गरेको छ ।
अघिल्लो आर्थिक वर्षमा प्रहरीले एक हजार एक सय ५१ जनालाई लागुऔषधसहित नियन्त्रणमा लिएको थियो ।
पूर्वी पहाडी क्षेत्रमा उत्पादन, भारतमा निकासी
पूर्वी नेपालका पहाडी जिल्लाहरूमा उत्पादन भएको गाँजा मोरङको सीमावर्ती क्षेत्रमा भण्डारण गरी भारतमा बिक्री गर्ने ठुलै गिरोह सक्रिय रहेको पाइएको छ ।
माघयता डेढ महिनाको अवधिमा मात्र प्रहरीले करिब दुई हजार किलो गाँजा बरामद गरेपछि गाँजा ओसारपसारमा ठुलै गिरोह रहेको निष्कर्षमा प्रहरी पुगेको हो ।
ओसारपसार, बेचबिखन र प्रयोगमा पूर्ण रूपमा प्रतिबन्ध लगाइएको गाँजा धनकुटा, उदयपुर, तेह्रथुम, भोजपुरलगायतका जिल्लामा उत्पादन गरी भारत पुर्यायाउने गरिएको अनुसन्धानबाट खुलेको एसपी तिम्सिनाले जानकारी दिए ।
पहाडी क्षेत्रमा उत्पादन भएको गाँजा एम्बुलेन्स, तरकारी बोक्ने गाडी, इन्धन ट्यांकरमार्फत् ओसारपसार गरी भारततर्फ पुर्याउने गिरोह पछिल्लो समय सक्रिय रहेको तिम्सिनाले बताए ।
पूर्वी पहाडी जिल्लामा गाँजाको खेती नै गरेर सेवनका लागि तयारी भएको गाँजा सीमावर्ती क्षेत्रसम्म आइपुग्दा सुरक्षा निकायको भूमिकामाथि नै प्रश्न उठ्ने गरेको छ ।
तथापि, यस्तो आपराधिक गतिविधिमा संलग्न रहने प्रहरी अधिकारीलाई कारबाही गर्ने एसपी तिम्सिना सुनाउँछन् ।
प्रहरीले बर्सेनि गाँजा खेती फँडानी गर्ने, उत्पादन तथा ओसारपसार गर्ने गिरोहको सञ्जाल भत्काउने अभियानमा सक्रिय रहेको दाबी गर्छ ।
लागुऔषध दुर्व्यसनलाई निरुत्साहन गर्न विभिन्न सचेतनामूलक अभियान सञ्चालन गरिरहेको बताइएको छ ।
