प्रतिकात्मक फोटो विराटनगर । सुनसरीको रामधुनी नगरपालिकामा मंगलबार भएको मोटरसाइकल दुर्घटनामा परी एक युवकको मृत्यु भएको छ ।
मृत्यु हुनेमा मोटरसाइकल चालक रामधुनी-९ का २४ वर्षीय करण चौधरी रहेको राजमार्ग सुरक्षा तथा ट्राफिक व्यवस्थापन कार्यालय इटहरीले जनाएको छ ।
हिजो साँझ ५ः३० बजेतिर रामधुनी-४ मानपुरस्थित ग्राबेल भित्री सडकखण्डमा मानपुरबाट मर्चैयातर्फ जाँदै गरेको प्रदेश १-०२-०४७ प २०४८ नम्बरको मोटरसाइकल दुर्घटनामा परेको थियो ।
मोटरसाइकल आफैं अनियन्त्रित भई दुर्घटना हुँदा करण गम्भीर घाइते बनेका थिए । उनलाई उपचारको लागि जिल्ला अस्पताल इनरुवा पठाइएकोमा अस्पताल पुर्याउनासाथ चिकित्सकले मृत घोषणा गरेका हुन् ।
दुर्घटनामा परेको मोटरसाइकल प्रहरी चौकी सिंघियाको नियन्त्रणमा रहेको छ ।
तीव्र गतिका कारण दुर्घटना भएको प्रहरीको प्रारम्भिक अनुसन्धानमा खुलेको छ ।
