विराटनगर । सुनसरीको इटहरी उपमहानगरपालिकामा आइतबार भएका दुई दुर्घटनामा दुई जनाको मृत्यु भएको छ ।
इटहरीका दुई भिन्नाभिन्नै ठाउँमा भएका दुर्घटनामा परी दुई जनाको मृत्यु भएको प्रहरीले जनाएको छ ।
हिजो बिहान ६ बजेतिर इटहरी-१ मिलनचोकमा पश्चिमबाट पूर्वतर्फ जाँदै गरेको प्र १-०२-०५० प ०५६७ नम्बरको मोटरसाइकल आफैं अनियन्त्रित भई नालीमा पसेको थियो ।
सो दुर्घटनामा मोटरसाइकल चालक गढी गाउँपालिका-६ का ४२ वर्षीय टिपनारायण माझीको घटनास्थलमै मृत्यु भएको हो ।
यसैगरी हिजो दिउँसो १ः२० बजेतिर इटहरी-५ पूर्व-पश्चिम लोकमार्गमा पश्चिमबाट पूर्वतर्फ आउँदै गरेको प्रदेश नं. १-०२-०४६ प २८६२ नम्बरको स्कुटर सोही दिशाबाट आउँदै गरेको ना ६ ख ६५७५ नम्बरको ट्रकमा ठोक्किएको थियो ।
सो दुर्घटनामा स्कुटर चालक इटहरी-५ का अन्दाजी ३१ वर्षीय रविन राई गम्भीर घाइते बनेका थिए ।
घाइते उनलाई उपचारको लागि तत्काल बिपी कोइराला स्वास्थ्य विज्ञान प्रतिष्ठान धरान पठाएको थियो ।
उपचारका क्रममा उनको दिउँसो १ः५५ बजेतिर मृत्यु भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले जनाएको छ ।
इलाका प्रहरी कार्यालय, इटहरीले ट्रक र ट्रकका चालक झापा अर्जुनधारा नगरपालिका-९ का ४६ वर्षीय ठाकुरलाल तामाङलाई नियन्त्रणमा लिएको छ ।
