सोलुखुम्बु : सोलुखुम्बुमा पत्रकारमाथि हातपात गरेको आरोपमा पाँच जनालाई प्रहरीले पक्राउ गरेको छ ।
दुधकोशी खबरका रमन वनलाई गत शनिबार राति सल्लेरीस्थित उनकै कोठामा हातपात भएको थियो ।
तामाङ समुदायको ल्होछार पर्व मनाउने क्रममा शनिबार सल्लेरीस्थित एक होटलमा स्थानीय युवा मदिरा सेवन गरेर झगडा गरेका थिए ।
उक्त झगडाको भिडियो दुधकोशी खबरले सम्प्रेषण गरेको थियो । सोही विषयलाई लिएर वन कुटिएका थिए ।
वनको कोठामै पुगेर हातपात गरेको आरोपमा सोलुदुधकुण्ड नगरपालिका-५ का २८ वर्षीय राम तामाङ, सोही वडाका २६ वर्षीय सोनाम शेर्पा, २७ वर्षीय मङ्गल तामाङ, २८ वर्षीय लक्ष्मण तामाङ र ३२ वर्षीय सुब्बा तामाङ पक्राउ परेका हुन् ।
जिल्ला प्रहरी कार्यालय सोलुखुम्बुका प्रहरी निरीक्षक अनिलकुमार मिश्रका अनुसार उनीहरूलाई मंगलबार विभिन्न स्थानबाट पक्राउ गरिएको हो ।
सञ्चार माध्यममा भिडियो सामग्री प्रसारण गरेकै कारण आफूमाथि हातपात गरेको पत्रकार वनको आरोप छ ।
सोलुदुधकुण्ड–५ का वडाध्यक्ष मिङमार तामाङसहित राति आफ्नो कोठामा पुगेका व्यक्तिहरूले आक्रमण गरी भिडियो मेटाउन (डिलिट गर्न) धम्की दिँदै आफूलाई कुटपिट गरेको उनको भनाइ थियो ।
