विराटनगर । सुनसरी प्रहरीले सोमबार बरामद गरेको करिब दुई करोड नक्कली नोटमा एनआइसी एसिया बैंकको लोगोसहितको ट्याग भेटिएको छ ।
इनरुवा नगरपालिका-४ स्थित सुनसरी खोलाको पुलनजिकमा बोराभित्र झोलामा राखेर ल्याइएको अवस्थामा नक्कली नोट फेला परेको थियो ।
ट्राफिक प्रहरीले पश्चिमबाट पूर्वतर्फ आउँदै गरेको भारतीय नागरिक साफीले चलाएको भारतीय स्कोरपियोमा कालो ब्यागभित्र सेतो बोरामा राखिएको एक हजार दरका १८ हजार २५१ थान नक्कली नेपाली नोट बरामद गरेको थियो ।
बरामद गरेको नक्कली नोटको बन्डलमा एनआइसी बैंकको लोगोसहितको कागजले र्याप गरेको देखिएको छ ।
एनआइसी एसिया बैंकको लोगोसहितको कागज हुँदा उक्त रकम एनआइसी एसिया बैंकबाट बाहिर गएको हो कि भन्ने आशंका गर्न सकिन्छ ।
तर, प्रयोग भएको कागज सक्कली नभई नक्कली रहेको एनआइसी एसिया बैंक इनरुवा शाखाले जनाएको छ ।
बैंकका इनरुवा शाखा प्रमुख दीपक पोखरेल नक्कली पैसा बैंकमा आउनेबित्तिकै पत्ता लाग्ने भएकाले उक्त नगदमा प्रयोग भएको कागज नक्कली रहेको बताउँछन् ।
नक्कली पैसा बनाउने समूहले बैंकको लोगो प्रयोग गरी नक्कली कागत बनाएर प्रयोग गरेको उनको दाबी छ ।
‘प्रहरीले बरामद गरेको नक्कली नोटमा एनआइसी एसिया बैंकको लोगो सहितको कागज बेरिएको सुनेका छौ,’ उनले भने, ‘नक्कली नोट बैंकमा आएपछि डिटेक्सन मेसिनबाट पत्ता लागिहाल्छ । यसमा प्रयोग भएको कागज नक्कली हो ।”
यति ठुलो परिमाणमा बैंकबाट नक्कली नोटहरू बाहिर जानसक्ने कुनै आधार नै नभएकाले यो बैंकलाई बदनाम गराउने फन्डामात्र भएको उनको बुझाइ छ ।
सोमबार जिल्ला प्रहरी कार्यालय सुनसरीमा पत्रकार सम्मेलन गर्दै बरामद भएको नक्कली नेपाली नोट, भारतीय गाडी र भारतीय नागरिक साफीलाई प्रहरीले सार्वजनिक गरेको थियो ।
सुनसरी प्रहरीले दिएको जानकारी अनुसार नियन्त्रणमा लिइएको भारतीय गाडीको सुनसरी भन्सार कार्यालयबाट एकदिनको भन्सार अनुमति फेला परेकोले थप शंकास्पद देखिएको छ ।
सुनसरीको सीमासँग जोडिएको बीरपुरकै नागरिक पक्राउ पर्नु र बरामद गरिएको भारतीय नम्बर प्लेटको गाडीको सुनसरी भन्सार कार्यालयबाट एक दिनको अनुमति लिएको फेला पर्नुले सुनसरीकै नाकाबाट नोट ल्याएको अनुमान पनि छ ।
सुनसरीको भण्टाबारी नाकाबाट मात्रै सवारी साधन आवतजावत हुँदै आएको अवस्था छ ।
भारतमा छपाई गरी विभिन्न सीमा नाका हुँदै सुनसरी जिल्लाको सीमावर्ती क्षेत्रमा स्टक गरेर एकैपटक ठुलो परिमाणमा नोट लगिएको हुनसक्ने अनुसन्धानमा संलग्न सुरक्षाकर्मीले बताएका छन् ।
सुनसरी प्रहरीका एसपी विपिन रेग्मी अनुसन्धानबाट सबै कुरा खुल्ने बताउँछन् ।
‘अहिले विस्तृतमा अनुसन्धान सुरु गरिएको छ । घटनामा अन्य व्यक्ति पनि संलग्न हुनसक्छ’ उनले भने, ‘मुख्य गिरोहलाई पक्राउ गर्ने हिसाबले अनुसन्धान भइरहेको छ।’
यसअघि इटहरी प्रहरीले ठूलो परिमाणमा नेपाली नक्कली नोट बरामद गरेको थियो ।
तर, आइतबार बरामद गरेको रकम अहिलेसम्मै ठुलो भएको प्रहरीले जनाएको छ ।
ठुलो परिमाणमा नक्कली नोट बरामद हुनुले बजारमा समेत त्यस्ता नोट पुगिसकेको हुनसक्ने आशंका गरिएको छ ।
बजारमा कारोबार गर्दा नक्कली नोट पर्न सक्ने भएकाले सजग हुन प्रहरीले आग्रह गरेको छ ।
पछिल्लो समय बारम्बार नक्कली नोट बरामद भइरहेको छ ।
भारतका आधुनिक प्रेसमा छापेरसमेत नेपालमा नक्कली नोटको कारोबार हुने गरेको प्रहरी अनुसन्धानबाट खुल्दै आएको छ ।
