विराटनगर । सुनसरी प्रहरीले बराहक्षेत्र नगरपालिका-९ राजाबासबाट चार सय किलोभन्दा बढी गाँजा बरामद गरेको छ ।
मंगलबार (आज) बिहानका राति १ बजेतिर प्रहरीले राजाबासस्थित घाटनजिक कोशी किनारबाट ४०६ किलो ९४० ग्राम गाँजा बरामद गरेको हो ।
सुनसरी प्रहरी प्रमुख विपिन रेग्मीका अनुसार उक्त स्थानमा गाडीमा गाँजा रहेको सूचना प्राप्त भएपछि इलाका प्रहरी कार्यालय महेन्द्रनगरले खटिएको प्रहरी टोलीले गाँजा बरामद गरेको हो ।
प्रदेश ०१–०२–००१ ज ४०५० नम्बरको बोलेरो गाडीमा तलासी लिँदा त्यहाँ लुकाई राखेको अवस्थामा गाँजासहितको गाडी बरामद गरेको एसपी रेग्मीले जानकारी दिए ।
गाडीभित्र १३ वटा बोरामा गाँजा फेला परेको उनको भनाइ छ ।
गाँजाको कारोबारमा संलग्न रहेका दुई जनालाई पनि प्रहरीले पक्राउ गरेको छ ।
पक्राउ पर्नेमा बोलेरो चालक धरान उपमहानगरपालिका–४ का २५ वर्षीय सूर्य राई र भोजपुरको हतुवागढी गाउँपालिका–८ का २७ वर्षीय लक्ष्मण राई रहेका छन् ।
उनीहरूलाई नियन्त्रणमा लिन दुई राउन्ड हवाई फायरसमेत गर्नुपरेको एसपी रेग्मीले जनाए ।
आइतबारसमेत सुनसरी प्रहरीले धरानबाट १६३ किलो गाँजासहित दुई जनालाई पक्राउ गरेको थियो ।
त्यसैगरी सोमबार पनि १४९ किलो गाँजासहित १२ जना भारतीय नागरिक परेका थिए ।
सुनसरी प्रहरीले आइतबार नै इनरुवाबाट एक हजार रुपैयाँ दरका १ करोड ८२ लाख नक्कली नेपाली नोट बरामद गरेको थियो ।
सवारीसाधन चेकजाँचमा खटिएको ट्राफिक प्रहरीको टोलीले बीआर ११ एक्स ३४२९ नम्बरको स्कोरपियो गाडी रोकेको थियो ।
शंकास्पद अवस्थाको स्कोरपियो गाडीमा खानतलासी गर्दा पछाडिको भागमा लुकाइछिपाइ ल्याइएको नक्कली नोट बरामद भएको हो ।
नक्कली नोटसहित गाडी चालक भारत वीरपुरका २२ वर्षीय मोहम्मद सैयद पक्राउ पर्दा उनीसँगै रहेका अर्का व्यक्ति भने फरार भएका थिए ।
