विराटनगर । सुनसरी प्रहरीले नक्कली नोटसहित भारतीय नागरिकलाई पक्राउ गरेको छ ।
पक्राउ पर्नेमा भारत वीरपुरका २२ वर्षीय मोहम्मद सैयद रहेको सुनसरी प्रहरी प्रमुख विपिन रेग्मीले जानकारी दिए ।
उनी गाडी चालक हुन् । उनीसँगै रहेका अर्का व्यक्ति भने फरार रहेको प्रहरीले जनाएको छ ।
प्रहरी उपरीक्षक रेग्मीका अनुसार एक करोड ८२ लाख ५१ हजार नक्कली नोटसहित उनलाई पक्राउ गरिएको हो ।
उनीबाट आइतबार एक हजार दरका एक करोड ८२ लाख ५१ हजार नक्कली नोट बरामद भएको एसपी रेग्मीको भनाइ छ ।
भारतीय गाडीमा राखेर ल्याउँदै गरेको अवस्थामा इनरुवा नगरपालिका–४ स्थित सुनसरी खोलाको पुलनजिकबाट नक्कली नोट बरामद भएको हो ।
बोराभित्र झोलामा राखेर ल्याइएको अवस्थामा नक्कली नोट फेला परेको थियो ।
सवारीसाधन चेकजाँचमा खटिएको ट्राफिक प्रहरीको टोलीले बीआर ११ एक्स ३४२९ नम्बरको स्कोरपियो गाडी रोकेको थियो ।
शंकास्पद अवस्थाको स्कोरपियो गाडीमा खानतलासी गर्दा पछाडिको भागमा लुकाइछिपाइ ल्याइएको नक्कली नोट बरामद भएको हो ।
