ताप्लेजुङ । ताप्लेजुङस्थित प्रसिद्ध तीर्थस्थल पाथीभरामा दर्शनार्थीले विभिन्न देशमा मुद्रा भेटीका रूपमा चढाउने गरेका छन् ।
पाथीभरा क्षेत्र विकास समितिले अहिले पाथीभरामा भेटीका रूपमा चढाइएको भारतीय सिक्का गन्न थालेको छ ।
नेपालबाहेक अरू देशका सिक्का रकम पहिलो पटक गणना गर्न थालिएको पाथीभरा क्षेत्र विकास समितिका कार्यकारी निर्देशक प्रजिन हाङ्बाङले जानकारी दिए ।
उनका अनुसार हालसम्म नोट मुद्रा र नेपाली सिक्का मात्र गणना गरी व्यवस्थापन गरिँदै आएको थियो ।
माघ महिनाको दोस्रो सातायता भारतीय सिक्का गणना गर्न सुरु गरिएको र हालसम्म पाँच लाख रुपैयाँ बढी गणना गरी सकिएको छ ।
अहिले समितिको कर्मचारी तथा ज्यालादारी जनशक्तिमार्फत भारतीय सिक्का धमाधम गणना भइरहेको उनले जानकारी दिए ।
समितिका अनुसार पाथीभरामा संकलन भएको भारतीय सिक्का अझै ठुलो परिमाणमा गणना गर्न बाँकी छ ।
भारतीय सिक्का गणना गरिसकेपछि सटहीको प्रक्रिया अघि बढाइने छ ।
यता पाथीभरामा संकलन भएको भेटी रकमअन्तर्गत पुस मसान्तसम्म गणना भएको नेपाली सिक्का र नोट गरी समितिको खातामा आठ करोड ७० लाख ५२ हजार ५४८ रुपैयाँ मौज्दात छ ।
समितिका अनुसार कुल मौज्दात रकममध्ये पुस महिनामा मात्र ३५ लाख २९ हजार रुपैयाँ भेटी रकम संकलन भएको थियो ।
