विराटनगर । सुनसरीको इटहरी उपमहानगरपालिकास्थित कटुवाल होटलको पहिलो ‘आउटलेट’ विराटनगरमा खुलेको छ ।
सोमबारबाट औपचारिक रूपमा विराटनगर महानगरपालिका-४ खार्जी चोकमा उक्त आउटलेट सञ्चालनमा आएको हो ।
कोशी प्रदेशका पर्यटन, वन तथा वातावरण मन्त्री गणेशप्रसाद उप्रेती ‘सुशील’ले सो होटलको उद्घाटन गरेका थिए ।
होटलको उद्घाटन गर्दै मन्त्री उप्रेतीले इटहरीपछि प्रदेशको राजधानी विराटनगरमा पनि होटलले अझ राम्रो सेवा प्रदान गर्नेमा विश्वस्त रहेको सुनाए ।
इटहरीस्थति कटुवाल होटलमा आफूले पनि १०-१२ वर्षदेखि विभिन्न परिकारहरू खाँदै आएको उनको भनाइ छ ।
नेपाली स्वादको मासुको परिकार बिक्री गरेर सीमावर्ती भारतका आन्तरिक पर्यटकहरूलाई समेत आकर्षित गर्न मन्त्री उप्रेतीले आग्रह गरे ।
होटल सञ्चालक मणिन्द्र कटुवालले इटहरीपछि पहिलोपटक विराटनगरमा शाखा सञ्चालनमा ल्याएको बताए ।
करिब ३५ लाख रुपैयाँको लगानीमा विराटनगरका उपभोक्तालाई लक्षित गरी होटलको शाखा सञ्चालन गरिएको उनको भनाइ छ ।
तत्कालका लागि १० जनालाई रोजगारी प्रदान गरिएको बताउँदै उनले आफ्नो होटलमा खसीको सेकुवासहित अनेकौं मासुका परिकार पाइने उल्लेख गरे ।
विराटनगरमा लोकल कुखुरा र हाँसको मासुका परिकार पनि उपलब्ध हुने उनको भनाइ छ ।
इटहरीमा २०५४ सालमा सामान्य रूपमा सुरु गरिएको होटल अहिले छुट्टै ब्रान्डका साथ स्थापित भइरहेको उनको भनाइ छ ।
इटहरीमा होटेल सुरु गरेको दिनको सम्झनामा २६औं वार्षिकोत्सवको अवसर पारेर विराटनगरमा पनि सेवा विस्तार गरिएको उनले बताए ।
उद्घाटन कार्यक्रममा कोशी प्रदेशसभा सदस्य गीता तिम्सिना, पूर्वप्रदेशसभा सदस्य कुशल लिम्बुलगायतको उपस्थिति रहेको थियो ।
