भोजपुर । भोजपुरको साल्पासिलिछो गाउँपालिका–३, चौकीडाँडाका एक किसानले रङबिरङ काउली फलाएका छन् ।
चौकीडाँडास्थित तालखर्कका किसान सुरेन्द्र सोताङ राईले टनेलमा किसिम-किसिमका काउली फलाएका हुन् ।
६ वर्षदेखि व्यावसायिक तरकारी तथा फलफूल खेतीमा लागेका राईले २०७६ देखि रोमानेस प्रजातिको खैरो र हिमाली चुचुराका आकार देखिने आकर्षक काउली फुलाएका थिए ।
यसै वर्ष भने उनले एक साथीबाट पहेँलो र बैजनी फुल्ने काउलीको बिउ ल्याएका थिए । यही सिजनमा मात्र लगाएका ती दुवै रङका काउली फलेपछि रङबिरङ देखिएका हुन् ।
उनको टनेल खेतीमा रैथाने सेतो, सुनौलो, बैजनी र खैरो रोमानेस र ब्रोकाउली गरी पाँचथरीका काउली फक्रेका छन् ।
रङबिरङ काउलीको सपना भने उनलाई वैदेशिक रोजगारीले देखाएको हो ।
वैदेशिक रोजगारीको त्यही सपनालाई साकार पार्न उनले उता कमाएको सबै सम्पत्ति गाउँ फर्केर लगानी गरेका छन् ।
वैदेशिक रोजगारीको सिलसिलामा मलेसिया र साउदी अरब गएका राईले गाउँ फर्किएर तरकारी र फलफूल खेतीमा तल्लीन भएका हुन् ।
विदेशमा कमाएको १० लाख रुपैयाँको लगानीमा सुरु गरेको सुपर चोमोलुङमा एग्रो फार्ममा अहिले धेरै नयाँ प्रजातिका तरकारी र फलफूल लगाइएको छ ।
काउलीका अतिरिक्त सलगम, लेट्युस, फेनल, आलु, मुला, रायो, बकुल्ला, केराउलगायत तरकारी राईको बारीमा छन् ।
एभोकाडो, स्याउ, किवी, जापानी कटुस, जापानी नास्पाती, जापानी आरु, जापानी हलुवावेद, सिल्भरबेरी, जापानी बखडा, अमेरिकी आरु, कागतीलगायतका फलफूल र ओरीगानो, फाइम, क्यामबाइल, आल्मड, प्याज, लसुनलगायत मसला बाली पनि लोभलाग्दो छ ।
तिनबाट मह निकाल्न मौरी पनि पालिएको छ ।
