नवराज भट्टराई ‘कोहम’
सक्नेले त काम गरिहाल्छ नि महोदय,
केही गर्न नसक्नेले मात्रै मलाई आलोचना गरेको छ
उसको आलोचना मलाई धेरै काम लागेको छ ।
तर, त्यही आलोचनाले उसको जीवन अचानोमा परेको छ,
उसलाई न एक गाँस भात खान दिएको छु, मैले
न त मबाट कुनै तलब भत्ता लिएको छ उसले
विचरा निःशुल्कै उसले मेरो यत्रो प्रचार गरेको छ ।
तर, त्यही प्रचारको जलनले ऊ पलपल मरेको छ
मेरै कारणले उसको भोक,प्यास,निद हराम भएको छ,
तर, न त्यसवापत उसले कुनै क्षतिपूर्ति मागेको छ
कत्रो त्याग, तपस्या, बलिदान उसको मप्रति
मृत्युको पनि प्रवाह नगरी ऊ रातोदिन डाँडापाखा झरेको छ ।
आफ्नै लागि केही सोच्न भ्याएको छैन, मैले
अहोरात्र सबै काम छोडी मेरै लागि ऊ चिन्ता गरिरहेको छ
पूण्यको कमाइले मात्र यस्ता परम हितैषी पाएको छु, मैले
किनकि जिउँदो सहिद भएर उसले मेरो प्रचार छरेको छ ।
उसले मलाई उसकै अमूल्य जीवन दिएको छ
मैले उसलाई जाबो धन्यवादसमेत दिएको छैन
आज छ्ड्के सलाम छ मेरो उसलाई
किनकि उसले मेरा लागि बली चढ्दै अनेक जँघार तरेको छ ।
