इलाम । पर्यटकीय क्षेत्र इलामको पर्यटन लयमा फर्कन थालेको छ ।
कोभिड-१९ महामारीका कारण पछिल्ला तीन वर्ष थला परेको इलामको पर्यटन लयमा फर्कन थालेको हो ।
पछिल्लो केही समययता इलामका दर्जनौं पर्यटकीयस्थल घुम्न जिल्ला बाहिरबाट आउने आन्तरिक र बाह्य पर्यटकको संख्या बढ्न थालेको छ ।
झापाबाट मेची राजमार्गको इलाम प्रवेशद्वारमा रहेको पर्यटन सूचना केन्द्र जोरकलश, रोङको तथ्यांकअनुसार चालू आर्थिक वर्ष २०८०-८१ छ महिनामा ८५ हजार तीन सय २६ जना पर्यटक इलाम भित्रिएका छन् ।
गत साउन १ देखि पुस मसान्तसम्म ७४ हजार सात सय ७७ आन्तरिक र १० हजार पाँच सय ४९ जना विदेशी पर्यटक इलाम भित्रिएका छन् ।
कन्याम, श्रीअन्तु, पशुपतिनगर, फिक्कल, सन्दकपुर, माईपोखरी, ढापपोखरी, पानीटार, कुइभिर, गजुरमुखी, माङमालुङलगायत इलामका पर्यटकीय क्षेत्रहरूमा बर्सेनि आन्तरिक र बाह्य पर्यटकहरू घुम्न आउने गरेका छन् ।
