विराटनगर । कोशी प्रदेशको विराटनगरमा राष्ट्रियसभा सदस्य पदको मतदान सम्पन्न भएको छ ।
राष्ट्रियसभा सदस्यको दुई पदका लागि बिहीबार भएको निर्वाचनमा कुल ९९ प्रतिशत मत खसेको हो ।
कुल मतदाता ३६७ रहेको कोशी प्रदेशमा ३६४ मत खसेको छ । तीन जनाले भने मत खसालेनन् ।
झापाको झापा गाउँपालिकाका अध्यक्ष जयनारायण साह निलम्बनमा परेका कारणले मतदाता सूचीबाट उनको नाम हटाइएको प्रदेश निर्वाचन कार्यालयले जनाएको छ ।
सहायक निर्वाचन अधिकृत हेमबहादुर बुढाथोकीका अनुसार धरान उप–महानगरपालिका प्रमुख र ग्रामथान गाउँपालिका अध्यक्षले पनि बिहीबार भएको निर्वाचनमा मतदान गरेनन् ।
धरानका मेयर हर्क साम्पाङ राईले राष्ट्रियसभाको निर्वाचन नै बहिष्कार गरेकाले मत नखसालेको बताइएको छ ।
ग्रामथानका अध्यक्ष जयप्रकाश गच्छदार थारू भने सिकिस्त बिरामी भएका कारण मत खसाल्न आउन नसकेको बुझिएको छ ।
अध्यक्ष थारूमा मुटुसम्बन्धी समस्या देखिएको निर्वाचन कार्यालयले जनाएको छ । उनको विराटनगरस्थित नोबेल अस्पतालमा उपचार भइरहेको छ ।
मतदान अवधि सकिएपछि बिहीबार नै मतगणना गर्ने तयारी भइरहेको बुढाथोकीले जानकारी दिए ।
सत्ता गठबन्धनबाट कोशी प्रदेशको अन्यतर्फ कांग्रेसका कृष्णप्रसाद सिटौला र महिलातर्फ माओवादीकी चम्पा कार्की उम्मेदवार छन् ।
कोशीमा गठबन्धनसँग प्रतिस्पर्धा गर्न नेकपा एमाले र राष्ट्रिय स्वतन्त्र पार्टीभित्र चुनावी तालमेल भएको छ ।
सिटौलाविरुद्ध राप्रपाका उद्धव पौडेल र कार्कीसँग नेकपा एमालेकी रुक्मिणी कोइराला भिड्दै छन् ।