विराटनगर । मोरङको बूढीगंगा गाउँपालिकामा ओल्ड दरबार रेस्टुराँ सञ्चालनमा आएको छ । अंग्रेजी नयाँ वर्षको अवसर पारेर नवउद्यमी कोषराज खनालले बूढीगंगा–२ टंकीसिनवारीमा उक्त रेस्टुराँ सञ्चालनमा ल्याएका हुन् ।
विश्वव्यापी आर्थिक मन्दीका बीच खनालले ५० लाख रुपैयाँ लगानी गरेर सो रेस्टुरेन्टको थालनी गरेका हुन् । शान्त वातावरणमा अवस्थित रेस्टुरेन्टमा परम्परागत कटेजमा बस्न पाइने, ९९ प्रतिशत फ्रेस खानेकुरा पाइने खनाल बताउँछन् ।
‘प्राइभेसीसहितका ट्रेडिसनल कटेजमा बस्न पाइने, लोकल कुखुरा, हाँस, मटन तास, थकाली र थाली खानालगायत दुई सय ५० प्रकारका परिकार यहाँ पाइन्छ,’ उनले भने, ‘चितवनको फ्लेवरमा तास बनाउँछौं । अरूतिरभन्दा सुलभ मूल्यमा सहज र छिटो सेवा दिन्छौं ।’
उनका अनुसार दम बिर्यानी, चिकेन रमपञ्चलगायत विशेष परिकार पाइने खनालको भनाइ छ । त्यसबाहेक जन्मदिन, वैवाहिक वर्षगाँठलगायत ‘इभेन्ट’ का लागि छुट्टै कोठाको व्यवस्था रहेको उनले बताए ।
हालसम्म आफ्नो होटलमा आएका ग्राहकबाट सन्तुष्टिसहित सकारात्मक प्रतिक्रिया पाएका कारण आर्थिक मन्दीका बीचमा पनि आँट आएको खनालले सुनाए ।
होटल व्यवसायतिर पहिलोपटक पाइला चालेका खनालले १० जनालाई रोजगारी प्रदान गरेका छन् । १९ वर्षको उमेरमा विदेशिएका खनालले नेपाल फर्किएर रेस्टुराँ सञ्चालनमा ल्याएका हुन् ।
