विराटनगर । विराटनगर महानगरपालिका-१७ का वडाध्यक्ष समिम कमरलाई नेकपा एमाले वडा कमिटीले ध्यानाकर्षण पत्र बुझाएको छ ।
बुधबार वडा कमिटीले सरसफाइ, पानीको निकासका लागि नाला र विद्यालयमा शौचालयको व्यवस्थापन गर्न माग गर्दै वडा कार्यालयमा ध्यानाकर्षणपत्र बुझाएको हो ।
महानगरपालिका कमिटीका सदस्य हामिद आजादका अनुसार विराटनगर–१७ मा एउटा मात्रै सामुदायिक विद्यालय छ ।
उक्त विद्यालयको शौचालय दुर्गन्धित हुँदा पनि त्यसको व्यवस्थापनमा कसैको चासो पुग्न सकेको छैन ।
स्थानीय सरकारअन्तर्गत वडाको नेतृत्वले त्यसमा सुधार ल्याउनुपर्ने माग प्राथमिकतामा राखेर ध्यानाकर्षण बुझाइएको आजादले बताए ।
यसैगरी, वडामा सरसफाइ, खानेपानी र पानीको निकास हुनेगरी नालाको व्यवस्थापन गर्नुपर्ने मागसमेत राखिएको आजादले बताए ।
ज्ञापनपत्र बुझाउन वडा कमिटीका अध्यक्ष मोहम्मद गुलजार, सचिव कृष्ण यादवलगायतको सहभागिता रहेको थियो ।
