संखुवासभा । नेपाल प्रहरीको साइबर ब्युरोले गौशाला-२६ को तस्बिर सार्वजनिक गर्ने एक जनालाई पक्राउ गरेको छ ।
साइबर ब्युरोका प्रवक्ता तथा प्रहरी उपरीक्षक पशुपतिकुमार रायका अनुसार पक्राउ पर्नेमा संखुवासभाका ३२ वर्षीय केशरमान राई रहेका छन् ।
संखुवासभा प्रहरीको सहयोगमा साइबर ब्युरोले मंगलबार बेलुका राईलाई पक्राउ गरेर काठमाडौं पुर्याएको हो ।
उनीमाथि विद्युतीय ऐनअनुसारको कसुरमा अनुसन्धानका लागि काठमाडौं जिल्ला अदालतबाट सात दिनको म्याद थप भएको प्रहरीले जनाएको छ ।
गौशाला-२६ ले आफ्नो तस्बिर सार्वजनिक गरेको भन्दै साइबर ब्युरोमा उजुरी दिएकी थिइन् ।
सोही उजुरीका आधारमा अनुसन्धानका क्रममा राईले गौशाला-२६ को तस्बिर सार्वजनिक गरेको पुष्टि भएपछि पक्राउ गरिएको प्रहरीले जनाएको छ ।
क्रिकेटर सन्दीप लामिछानेले आफूमाथि बलात्कार गरेको भन्दै गौशाला-२६ ले उजुरी दिएकी थिइन् ।
सोही मुद्दामा बलात्कार ठहर गर्दै लामिछानेलाई जिल्ला अदालत काठमाडौंले आठ वर्ष जेल सजायको फैसला सुनाएको छ ।
