उर्लाबारी । मोरङका दुई पालिकाबाट एकै दिन दुई जना वृद्ध बेपत्ता भएका छन् ।
पथरीशनिश्चरे नगरपालिका-९ का ७६ वर्षीय जनकलाल बास्कोटा गत पुस २१ गते बिहानदेखि बेपत्ता भएका छन् ।
नाति लेखनाथ बास्कोटाका अनुसार उनी पुस २१ गते बिहान साढे ७ बजेतिर चिया खाएर चोक निस्किन्छु भनेर हिँडेका थिए ।
त्यसयता परिवारसँग सम्पर्कविहीन बनेका जनकलाल एक साता बितिसक्दा पनि घर फर्किएका छैनन् ।
हजुरबुबा कान कम सुन्ने र बेला–बेला होसका कुरा नगर्ने बताउँदै उनका नाति लेखनाथले खोजी तीव्र पारिएको जनाए ।
हेर्दा खाइलाग्दो देखिने जनकलालको एकोहोरो हिँडिरहने बानी रहेको उनको भनाइ छ ।
उनी छोरा गोपाल बास्कोटाको साथमा बस्दै आएका थिए ।
यस्तै, सोही दिनको सोही समयमा उर्लाबारी नगरपालिका-९ का ७६ वर्षीय नारायणप्रसाद सापकोटा बेपत्ता भएका छन् ।
उनीहरू दुवै जना गत पुस २१ गते बिहानदेखि परिवारसँग सम्पर्कविहीन भएका हुन् ।
खोजी थालेको एक साता बितिसक्दा पनि उनीहरू नभेटिएको परिवारस्रोतले जनाएको छ ।
