म्याग्दी – म्याग्दीमा धारिलो ढुंगा (छपनी) प्रहारबाट एक जनाको हत्या भएको छ ।
शनिबार दिउँसो म्याग्दीको मालिका गाउँपालिका-७ बिमकी ६६ वर्षीया अमृता जुग्गाली र सात वर्षीया प्रियंका गर्बुजामाथि ढुंगा प्रहार भएको थियो ।
जसमा गम्भीर घाइते भएकी गर्बुजाको शनिबार बेलुका पोखराको मणिपाल शिक्षण अस्पतालमा उपचारको क्रममा मृत्यु भएको हो ।
शनिबार दिउँसो हजुरआमामाथि आक्रमण भएपछि उनी छेक्न पुगेकी थिइन् ।
छेक्ने क्रममा उनीमाथि पनि ढुंगा प्रहार भएको थियो ।
ढुंगा प्रहारबाट घाइते बनेका प्रियंका र अमृतालाई हेलिकप्टरबाट मणिपाल शिक्षण अस्पताल लगिएको थियो ।
अस्पतालमा चिकित्सकले प्रियंकालाई मृत घोषित गरेका थिए । अमृताको भने उपचार जारी छ ।
उनी खतरामुक्त रहेको म्याग्दीका प्रहरी नायब उपरीक्षक मदन कुँवरले बताए । उनीमाथि चिर्पट पनि प्रहार भएको बताइएको छ ।
हजुरआमालाई दरवाङ–मराङ सडकमा रगताम्मे देखेपछि बचाउन गएकी प्रियंकाको टाउकोमा छपनी प्रहार भएको थियो ।
प्रियंकाका भाइ प्रिन्स भने घरको खाटमुनि लुकेर ज्यान बचाएका थिए ।
मनिषाका छोरा र बुहारी खेतमा काम गर्न गएका समयमा घटना भएको थियो ।
लुरवाङको माथि जङ्गलमा घाँस काट्दै गरेका अमृता र अर्का एक जना महिलामाथि पनि चिर्पट प्रहार भएको थियो ।
प्रतिकार गर्ने क्रममा अमृता घाइते भएकी थिइन् ।
बिमको तल्लो गाउँनजिकै एक ट्याक्सी पनि तोडफोड भएको स्थानीयले बताएका छन् ।
हत्या र आक्रमणमा संलग्न भएको आरोपमा मालिका–७ बिमवाङबाट स्थानीयले एक जना मानसिक सन्तुलन ठिक नभएका व्यक्तिलाई नियन्त्रणमा लिएर प्रहरीमा बुझाएका थिए ।
‘एक जना शङ्कास्पद व्यक्तिलाई नियन्त्रणमा लिएका छौँ,’ प्रनाउ कुँवरले भने, ‘विस्तृत अध्ययन र अनुसन्धानका क्रममा रहेकाले पक्राउ परेका व्यक्तिको नाम गोप्य राखिएको छ ।’
प्रहरीले पक्राउ परेका व्यक्तिलाई आज सार्वजनिक गर्ने तयारी गरेको छ । मृतकको शव परीक्षणका लागि बेनी अस्पतालमा लगिएको छ ।
