उदयपुर । उदयपुरको त्रियुगा नगरपालिकाको एक फर्ममा अज्ञात रोगका कारण एकै दिन १८ बाख्रा र गाई मरेका छन् ।
त्रियुगा-१० स्थित आदर्श टोलको हिमचुली कृषि फर्ममा फैलिएको अज्ञात रोगबाट २४ घण्टाभित्र १८ वटा बाख्रा र एउटा गाई मरेको हो ।
स्थानीय किसान प्रेमबहादुर खड्काको फर्ममा मंगलबार बिहानदेखि फैलिएको उक्त रोगका कारण बुधबार बिहानसम्म १८ वटा माउ बाख्रा र एउटा जर्सी गाई मरेको हो ।
अरू बाख्रा बिरामी रहेको वडाध्यक्ष किरण पाण्डेले बताए ।
पशु सेवा विकास कार्यालय उदयपुरका प्राविधिक अधिकृत विकास कार्कीका अनुसार लगातार पखाला लाग्ने, मुखमा फिँज आउने, आँखा भासिने , पेट फुल्ने लक्षण रहेको उक्त रोग के हो भन्ने एकिन हुन सकेको छैन ।
अहिलेसम्म गरिएको उपचार प्रयास असफल भएकोले ल्याब परीक्षणका लागि बाख्राको मल, मूत्र र्याल आदिको नमुना सङ्कलन गरेर माथिल्लो निकायमा पठाइएको र थप प्राविधिक पनि बोलाएको उनले बताए ।
