विराटनगर । विराटनगरस्थित विराट नर्सिङ होमपूर्व शङ्करपुर मार्गमा आजदेखि मोरङ व्यापार सङ्घ एक्स्पो २०८० (विराट एक्स्पो) सुरु हुने भएको छ ।
आज प्रधानमन्त्री पुष्पकमल दाहाल ‘प्रचण्ड’ ले एक्स्पोको उद्घाटन गर्ने छन् ।
एक्स्पो उद्घाटनका लागि बिहीबार नै विराटनगर आएका प्रचण्ड अहिले छोरी-ज्वाइँ गङ्गा र जीवन आचार्यको घरमा बास बसेका छन् ।
आजदेखि सुरु हुने एक्स्पोको पुस १६ गते समापन हुने बताइएको छ । विराटनगरमा प्रत्येक वर्ष एक्स्पो हुने गरेको छ ।
यसपटक एक्स्पोका लागि दुई सय ५० वटा स्टल तय भएको थियो ।
तर, एक्स्पोको एक साताअघि नै सम्पूर्ण स्टलहरू बिक्री भएपछि २५ स्टल थप भएको आयोजक मोरङ व्यापार सङ्घका अध्यक्ष नवीन रिजालको भनाइ छ ।
एक्स्पोका लागि बनाइएका स्टलहरू नेपाल, भारत, पाकितान र बङ्गलादेशका उद्योगी तथा व्यापारीहरूले खरिद गरेका हुन् ।
एक्स्पोलाई अझै आकर्षण बनाउन रोटेपिङ, झुला ,ड्राइगन जस्ता खेलसँगै मनोरञ्जन लागि कन्सर्टको पनि आयोजना हुने भएको छ ।
एक्स्पोमा अवलोकन गर्ने दर्शक र कारोबार पनि राम्रै हुने आयोजकको अपेक्षा छ ।
अध्यक्ष रिजालले ६ देखि सात लाखले अवलोकन गर्दा २० करोड बढीको कारोबार हुने अपेक्षा राखिएको जनाएका छन् ।
एक्स्पोमा खर्च साढे दुई करोड बढी हुने अनुमान गरिएको छ ।
