इटहरी उपमहानगरपालिकास्थित एक घरमा देखा परेको चितुवालाई नियन्त्रणमा लिइएको छ ।
इटहरी ९ र ६ को सिमामा रहेको एकता टोलको लेहरु चौधरीको घरमा बिहान फेला परेको चितुवालाई कोसी टप्पु वन्यजन्तु आरक्षका जालीसहितको विज्ञ टोलीले ६ घण्टाको प्रयासपछि नियन्त्रणमा लिएको हो ।
पानीले भिजेको अवस्थामा बिहान देखा परेको चितुवालाई नियन्त्रणमा लिन केही अप्ठ्यारा भएपनि कुनै प्रकारको क्षतिबिना नियन्त्रणमा लिन सफल भएको इटहरी–६ का वडाअध्यक्ष दिवस पोखरेलले जानकारी दिए ।
‘चितुवा देखेपछि हल्लाखल्ला भयो । अप्रत्याशित घटना भएकाले के गर्ने नगर्ने भन्ने द्विविधा भयो । विज्ञ टोली आउन निकै समय लाग्यो’ वडा अध्यक्ष पोखरेलले भने, ‘विज्ञ टोली आउनुअघि सम्म सुरक्षाकर्मी र जिल्ला वनका कर्मचारीले स्थान सुरक्षित बनाउनु भयो । टोली आउनसाथ नियन्त्रणमा लिने काम सुरु भयो । एक बजेतिर टोली चितुवा नियन्त्रणमा लिन सफल भयो ।’
त्रसित बनेका स्थानीय विज्ञ टोलीले चितुवालाई नियन्त्रणमा लिएसँगै ढुक्क भएका छन् ।
नियन्त्रणमा लिइएको चितुवाको आवश्यक स्वास्थ्य उपचार गरी नजिकैको वनमा छाडिने बताइएको छ ।
