नेपाली राष्ट्रिय फुटबल टोलीका २४ खेलाडीहरूलाई बन्द प्रशिक्षणका लागि बोलाइएको छ ।
मुख्य प्रशिक्षक अब्दुल्लाह अल्मुताइरीले बिहीबार एएफसी एसियन कप छनोटअन्तर्गत तेस्रो चरणको खेलका लागि बन्द प्रशिक्षणमा २४ खेलाडीलाई बोलाएका हुन् ।
अखिल नेपाल फुटबल सङ्घ (एन्फा) ले एएफसी एसियन कप छनोट खेलको तयारीका लागि खेलाडीलाई बन्द प्रशिक्षणमा बोलाइएको जनाएको छ ।
नेपाली टोलीको बन्द प्रशिक्षण अप्रिल १५ तारिखबाट हुने एन्फाले जनाएको छ ।
एएफसी एसियन कप छनोट खेलमा नेपाल समूह ‘ए’ मा छ ।
समूहमा नेपालसहित कुवेत, जोर्डन र इन्डोनेसिया छन् । नेपालका लागि यो समूह तुलनात्मक रुपमा निकै कठिन समूह हो ।
समूह चरणको खेल जुन ८ देखि १४ सम्म कुवेतमा आयोजना हुनेछ ।
छनोटमा सहभागी हुने २४ देशलाई ६ समूहमा विभाजन गरेको छ ।
प्रत्येक समूहको शीर्ष टोली र पाँच उत्कृष्ट दोस्रो टोली सन् २०२३ मा चीनमा आयोजना हुने एसिया कपमा छनोट हुनेछन् ।
यसअघि नेपाले एएफसी एसियन कप छनोटका लागि थाइल्यान्ड र त्यहाँको शीर्ष क्लब चोनबुरी एफसी मैत्रीपूर्ण खेल खेलेको थियो ।
चोनबुरीसँग नेपाल ३-१ गोलले पराजित भएको थियो भने थाइल्यान्डको राष्ट्रिय टोलीसँग २-० गोलले पराजित भएको थियो ।
बन्द प्रशिक्षणमा बोलाइएका खेलाडी
किरण कुमार चेम्जोङ, दीप कार्की, विशाल श्रेष्ठ, अनन्त तामाङ, अन्जन विष्ट, एरिक विष्ट, आयुष घलान, विकास खवास, विमल घर्तीमगर, दर्शन गुरुङ, देवेन्द्र तामाङ, दिनेश राजवंशी, गौतम श्रेष्ठ, मनिष डाँगी, नवयुग श्रेष्ठ, पुजन उपरकोटी, रोहित चन्द, सन्तोष तामाङ, सुजल श्रेष्ठ, सुमन अर्याल, सुमन लामा, सुनिल बल, सुरज ज्यु ठकुरी र तेज तामाङ ।
यो पनि :
त्रिदेशीय टी–२० : नेपालले पीएनजीलाई दियो दुई सय चार रनको विजयी लक्ष्य
थाइल्यान्डमा मैत्रीपूर्ण फुटबल खेलेर स्वदेश फर्कियो नेपाली टोली
