एएफसी एसियन कप छनोटको तयारी लागि थाइल्यान्ड गएर मैत्रीपूर्ण फुटबल खेलेको नेपाली राष्ट्रिय फुटबल टोली स्वदेश फिर्ता भएको छ ।
अखिल नेपाल फुटबल सङ्घ (एन्फा) ले नेपाली टोली सोमबार बेलुका स्वदेश फर्किएको जनाएको छ ।
थाइल्यान्डमा दुई मैत्रीपूर्ण खेल खेलेर नेपाली टोली सोमबार स्वदेश फर्किएको हो । नेपाल दुवै खेलमा पराजित भएको थियो ।
पहिलो खेलमा थाइल्यान्डको राष्ट्रिय टोलीसँग नेपाल २–० ले पराजित भएको थियो । यस्तै, शीर्ष डिभिजनको टोली चोनबुरी एफसीसँग ३–१ ले पराजित भएको थियो ।
नेपालका लागि एक मात्रै गोल दर्शन गुरुङले गरेका थिए ।
नेपाल राष्ट्रिय टोलीले चीनमा सन् २०२३ मा आयोजना हुने एएफसी एसियन कपको तेस्रो चरणको छनोटको तयारीका लागि थाइल्यान्ड भ्रमण गरेको हो ।
छनोटमा नेपाल समूह ‘ए’ मा रहेको छ। यही समूहमा जोर्डन, कुवेत र इन्डोनेसिया जस्ता बलिया टोली रहेका छन् ।
यो समूहका खेलहरू ८ जुनदेखि १४ जुनसम्म कुवेतमा हुने छ ।
नेपालले आफ्नो पहिलो खेलमा जोर्डनसँग ८ जुनमा कुवेत सिटीमा प्रतिस्पर्धा गर्ने छ ।
यस्तै, नेपालले ११ जुनमा कुवेत र १४ जुनमा इन्डोनेसियासँग प्रतिस्पर्धा गर्ने छ ।
थाइल्यान्ड भने समूह ‘सी’ मा छ । यो समूहमा उज्वेकिस्तान, माल्दिभ्स र श्रीलङ्का पनि छन् ।
