नेपाली राष्ट्रिय टोलीका स्ट्राइकर अन्जन विष्टलाई झापा फुटबल क्लबले नेपाल सुपर लिग (एनएसएल) फुटबलमा मार्की खेलाडीको रूपमा अनुबन्ध गरेको छ ।
‘ए’ डिभिजन लिग क्लब मनाङ मर्स्याङ्दीका कप्तानसमेत रहेका अन्जनलाई आइतबार झापा एफसीले मार्की खेलाडीका रूपमा अनुबन्ध गरेको हो ।
चैत २६ देखि जेठ ७ गतेसम्म सञ्चालन हुने फ्रेन्चाइज फुटबल लिग एनएसएलका लागि अन्जनलाई अनुबन्ध गरिएको क्लबका महासचिव सुजन गौतमले जानकारी दिए ।
मार्की खेलाडीसम्बन्धी सम्झौता पत्रमा गाैतम र अन्जन विष्टले हस्ताक्षर गरे ।
झापाले अन्जनलाई गत संस्करणको भन्दा धेरै रकममा अनुबन्ध गरेको पनि जनाएको छ ।
अनुबन्ध रकम भने उल्लेख गरिएको छैन । सम्झौता कार्यक्रममा अन्जनले क्लबको सोचले आफू प्रभावित भएर अनुबन्ध भएको बताए ।
नेपाल स्पोर्ट्स एन्ड इभेन्ट म्यानेजेमेन्ट (एनएसएल) को आयोजनामा सञ्चालन हुने एनएसएलमा विभिन्न १० सहरका १० टोलीको सहभागिता रहनेछ ।
प्रतियोगिातका खेलहरू पोखरा र काठमाडौँमा खेलाइने पनि बताइएको छ ।
