घाँस काटी पाठाशाला जान्थ्यौँ
नुन किनेर घर
भुटेको मकै खाजा खान्थ्यौँ
खाली खुट्टाको भर
कचिलो काप्लाककुप्लुक
तातो तातो खायो
घाँटीमा त्यो अड्किन्थ्यो
च्याख्ला पिरो रायो
स्कुल ड्रेसमा मामा घर
दसैँ आउँदा नाना
छैन टिफिन सुको कौडी
बासी भात खाना
कक्षाकोठा पानी बोकी
पोती भुँइ भित्तो
प्यास मेट्ने पानी हुन्न
गाग्री हुन्थे रित्तो
बस्ने बेन्च हुँदैनथे
पिर्का बस्ने तानीतानी
चुटिएका हात्तीछाप
चप्पल डोरी बानिबानि
४५ को ज्यामिती बक्स
स्केल झिकी नापी
४४ पाने क्यापिटल
सेतो सादा कापी
सरस्वती पूजा गर्न
१० रुपैयाँको चन्दा
प्रसादको पोको हेर्थ्याैँ
देवी पूजाभन्दा
कालोपाटी रङ्गाउने
बनमारा झार
भोक शीतयुद्ध हुन्थ्यो
बजाउन चार
मिठाइमा पिप्लामेन्ट
बिस्कुट थिन आरारोट
पुस्टकारी खाँदाखाँदै
पड्काउथ्यौँ ओठ
रहर हुन्थे नयाँ किताब
पुरानाको भारी
हिँड्न पर्थ्यो कोशौ कोश
धुलो डल्लो पारी
नयाँ लुगा लगाउन
कुर्न पर्ने पालो
भोटो सिलाइ लगाएको
फरियाको टालो
बोराभित्र किताब बस्थे
छैन टाँड र्याक
कपी हुन्थे सुमन मयुर
सरस्वती याक
सिसाकलम तिखार्ने त्यो
टोपाजको पत्ती
बाहिर-भित्र दियालो थ्यो
सलेदोको बत्ती
भिर्ने कलम बोक्दा हामी
ठुलो मान्छे हुन्थ्यौँ
गुणन गर्न भुँइ कोरी
धर्का तानी कोर्थ्यौँ
दुई रुपैयाँको कापी बोक्थ्यौँ
तीन रुपैयाँको कलम
यीनै सामान जुटाइदिने
बा-आमालाई सलाम !
