पोर्चुगिज खेलाडीद्वय क्रिस्टियानो रोनाल्डो र ब्रुनो फर्नान्डेसको गोलमा जित निकाल्दै म्यानचेस्टर युनाइटेड इङ्ग्लिस प्रिमियर लिगको शीर्ष चारमा उक्लिएको छ ।
मङ्गलबार राति घरेलु मैदानमा भएको खेलमा युनाइटेडले ब्राइटनलाई २–० गोलले हराउँदै शीर्ष चारमा स्थान बनाएको हो ।
शीर्ष चारमा उक्लने क्रममा युनाइटेडले वेस्ट ह्याम युनाइटेडलाई पछि पारेको छ ।
गए राति युनाइटेडले घरेलु मैदानमा १० खेलाडीमा समेटिएको ब्राइटनलाई हराउँदा रोनाल्डो र फर्नान्डेसले एक-एक गोल गरे ।
पहिलो हाफ गोलरहित बराबरीमा सकिएको सो खेलको ५१औँ मिनेटमा रोनाल्डोले गोल गर्दै युनाइटेडलाई सुरुआती अग्रता दिलाए ।
यससँगै उनले ६ खेलपछि गोल गरे ।
सन् २०२२ मा यो उनको पहिलो गोलसमेत हो ।
यसअघिका ६ खेलमा उनी गोलविहीन थिए ।
सातौँ खेलमा उनले एक गोल गरेका हुन् ।
यस्तै, खेलको ५४औँ मिनेटमा ब्राइटनका लेविस डन्कले रातो कार्ड पाएपछि पाहुना टोली १० खेलाडीमा समेटियो ।
एन्थोनी इलंगामाथि अनावश्यक च्यालेन्ज गरेपछि रेफ्रीले कप्तान लेविस डन्कलाई भिएआरको सहायतामा रातो कार्ड देखाउँदै मैदान बाहिर पठाए ।
त्यसको फाइदा उठाउँदै खेलको इन्ज्युरी समयमा फर्नान्डेसले गोल गरे ।
उनको गोलमा युनाइटेडले २–० गोलको जित निकाल्यो ।
यो जितसँगै युनाइटेड २५ खेलबाट ४३ अङ्क जोडेर वेस्ट ह्यामलाई २ अंकले पछि पार्दै चौथो स्थानमा उक्लिएको छ ।
उसले तेस्रो स्थानको चेल्सीसँगको अङ्क दुरी चारमा छोट्याएको छ ।
एक खेल कम खेलेको चेल्सीको ४७ अङ्क छ । पराजित ब्राइटन ३३ अङ्कर जोडेर नवौँ स्थानमा रहेको छ ।
