नेपाली काङ्ग्रेसले आफ्नो पार्टीको प्रवक्ताका रुपमा डा. प्रकाशशरण महतलाई नियुक्त गरेको छ ।
केन्द्रीय सदस्यमध्ये बाट प्रवक्ता छनोट गर्नुपर्ने प्रावधान अनुसार महतलाई पार्टी सभापति शेरबहादुर देउवाले नियुक्त गरेका हुन् ।
निवर्तमान प्रवक्ता विश्वप्रकाश शर्मा १४औं महाधिवेशनबाट महामन्त्रीमा निर्वाचित भएपछि रिक्त रहेको पदमा आज महतलाई नियुक्त गरिएको हो ।
यसअघि सह–महामन्त्री रहेको महत १४औं महाधिवेशनमा सभापति शेरबहादुर देउवाकै प्यानलबाट महामन्त्रीका लागि निर्वाचनमा उत्रिएका थिए ।
तर निर्वाचनमा पराजित भएका महतलाई देउवाले नै केन्द्रीय सदस्यमा मनोनित गरेका थिए ।
६३ वर्षीय महतले अमेरिकाको साउथ इलिनोइस विश्वविद्यालयबाट अर्थशास्त्रमा विद्यावारिधि गरेका छन् ।
