अफ्रिकी कप अफ नेसन्स (एफकन) २०२१को आज फाइनल खेल हुँदैछ ।
क्यामरुनस्थित ओलेम्बे रङ्गशालामा आज राती १२ः४५ बजे हुने खेलमा इजिप्ट र सेनेगल आमनेसामने हुँदैछन् ।
एफकनको सर्वाधिक सफल राष्ट्र हो इजिप्ट, प्रतियोगिताको ३३औं संस्करणसम्म आइपुग्दा इजिप्टले सात पटक उपाधि उचालिसकेको छ ।
यता सेनेगलले भने अहिलेसम्म पनि एफकनको ट्रफि जित्न सकेको छैन ।
प्रतियोगिताको दुई संस्करणमा उपविजेतामा नै सीमित बनेको सेनेगल आज नयाँ इतिहास रच्न चाहन्छ ।
सन् २००२ र २०१९ को एफकनमा उपविजेता बनेको सेनेगल प्रतियोगिताकै सर्वाधिक सफल राष्ट्रलाई पाखा लगाउँदै उपाधि हात पार्न चाहन्छ ।
समूह ‘बी’ मा रहँदै प्रतियोगिता सुरुवात गरेको सेनेगल जारी प्रतियोगिताको एक मात्र अपराजित टोली हो ।
उत्कृष्ट लयमा देखिएको सेनेगलले जिम्बावे, केप भर्डे, इक्वेटोरियल गिनी र बुर्किना फासोलाई पराजित गरेको छ भने मलावी र गिनीसँग बराबरी खेलेको छ ।
प्रतियोगिता अवधीभर नौ गोल गरेको सेनेगलले हालसम्म दुई गोल मात्रै खाएको छ ।
यता इजिप्टको फाइनल यात्रामा भने निकै उतारचढावमय देखिएको छ ।
प्रतियोगिताको पहिलो खेलमा नै नाइजेरियासँग पराजित बनेको इजिप्टले अन्तिम १६ र सेमिफाइनलमा पेनाल्टीमार्फत जित निकालेको थियो ।
प्रतियोगिताका ६ खेल खेल्दै फाइनल पुगेको इजिप्टले हालसम्म चार गोल गरेको छ भने दुई गोल मात्र खाएको छ ।
इंग्लिस क्लब लिभरपुलका स्टारद्वय साडियो माने र मो सलाह एक आपसमा भिड्न लागेकाले पनि आजको खेल निकै रोमाञ्चक हुनेछ ।
क्लब फुटबलमा निकै सफल देखिएका यी दुई जोडी आज एकअर्काविरुद्ध मैदान उत्रँदा दुवै जितको खोजीमा हुनेछन् ।
स्टार खेलाडीले भरिपूर्ण सेनेगलको चुनौती पाखा लगाउन इजिप्टलाई निकै हम्मे पर्ने निश्चित छ ।
साडियो माने, एडवार्ड मेन्डी, कालिदो कुलिबाली, बौना सार, बौलाए दिया, आबदोउ डियाले जस्ता स्टार खेलाडीले भरिएको सेनेगललाई रोक्न इजिप्ट पनि तयार छ ।
तर इजिप्टलाई भने गोलपोस्टमा केही समस्या देखिने निश्चित छ ।
पहिलो र दोस्रो रोजाईका गोलरक्षक प्रतियोगिताका दौरान चोटग्रस्त भएकाले आजको खेलमा इजिप्टको पोस्ट युवा गोलरक्षक सोभीले सम्हाल्न सक्ने सम्भावना उच्च छ ।
त्यसबाहेक कमल, ट्रेजागेय, हाम्दी, फतो, असरफ, एल–सुल्या, एल्नेनी, मोहम्मद र मार्मुसको नेतृत्व गर्दै स्टार मो सलाह आज उपाधिका लागि सेनेगलविरुद्ध मैदान उत्रनेछन् ।
