नेपाली राष्ट्रिय फुटबल टिमका कप्तान तथा गोलरक्षक किरणकुमार लिम्बुले अफ्रिकी राष्ट्र मोरिससविरुद्ध पहिलो मैत्रीपूर्ण खेलभन्दा दोस्रो कठिन भएको जनाएका छन् ।
मङ्गलबार भएको खेलमा जित निकालेपछि पत्रकार सम्मेलनका क्रममा बोल्दै कप्तान किरणले मोरिससविरुद्ध पहिलोभन्दा दोस्रो खेल कठिन रहेको बताए ।
त्रिपुरेश्वरस्थित दशरथ रङ्गशालामा भएको दोस्रो मैत्रीपूर्ण खेलमा नेपाललाई १–० गोलको जित दिलाउन सुजल श्रेष्ठले निर्णायक गोल गरेका थिए ।
साथै गोलकिपर किरणले एउटा पेनाल्टी बचाएका थिए ।
मोरिससले १२ औँ मिनेटमा पेनाल्टीको मौका पाएको थियो ।
नेपालका दिनेश राजवंशीले लिन्स्ले बर्सीलाई पेनाल्टी बक्सभित्र लडाएपछि मोरिससले पेनाल्टी पाएको थियो ।
तर मोरिससका कप्तान एन्डी सोफीले पेनाल्टीमा गोल गर्न सकेनन् ।
उनको प्रहार गोलरक्षक तथा कप्तान किरणकुमार लिम्बुले उत्कृष्ट बचाउ गरेका थिए ।
खेलपछि किरण प्लेयर अफ दि म्याचसमेत चुनिएका थिए ।
‘बलियो टिम मोरिसससँगको दुई मैत्रीपूर्ण खेल कठिन नै रह्यो,’ उनले भने, ‘तर पहिलोभन्दा दोस्रो झन् कठिन थियो । हामीले अग्रता त बनायाैँ तर जोगाउन निकै कठिन भएको थियो । खेलमा दुई वा तीन गोल गर्न पाएको भए सहज बन्थ्यो होला । तर एकमात्र गोलको अग्रता जोगाउन अफ्ठेरो भयो ।’
यो पनि :
