नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरी खेलको नजिताले सन्तुष्ट बनेपनि रेफ्रीको निर्णयबाट असन्तुष्ट बनेका छन् ।
मङ्गलबार मोरिससविरुद्धको दोस्रो मैत्रीपूर्ण खेल १-० गोलले जितेपछि पत्रकार सम्मेलनमा बोल्दै अल्मुताइरीले रेफ्री नविन्द्र महर्जनको निर्णयबाट असन्तुष्ट बनेको बताएका हुन् ।
खेलको दोस्रो हाफमा दुवै राष्ट्रका खेलाडीबीच विवाद हुँदा रेफ्री महर्जनले नेपालका एक र मोरिससका एक गरी दुई खेलाडीलाई रातो कार्ड दिएका थिए ।
सोक्रममा नेपालका पुजन उपरकोटीले रातो कार्ड पाए ।
यस्तै, विवादपछि मैदान छिरेका नेपालका गोलकिपर प्रशिक्षक विकास मल्लले रातो कार्ड पाएका थिए ।
तर मल्ललाई रातो नभएर पहेँलो कार्ड दिइनुपर्ने प्रशिक्षक अल्मुताइरीको धारणा छ ।
महर्जनको निर्णयको आलोचना गर्दै अलमुताइरीले त्यो कार्ड भने पहेँलो हुनपर्ने दाबी गरे ।
‘मलाई रेफ्री मनपर्छ र म उनीहरूलाई सम्मान गर्छु । आज हारेको भए पनि म रेफ्रीलाई केही भन्ने थिइनँ । सायद उनीहरूले एक दुई गल्ती गरे पनि त्यसले खेलका नतिजा परिवर्नत हुँदैन । हामीले फुटबल खेल्नुपर्छ । रेफ्री पनि मानिस नै त हुन्,’ उनले भने ।
त्रिपुरेश्वरस्थित दशरथ रङ्गशालामा नेपाललाई जिताउन सुजल श्रेष्ठले निर्णायक गोल गरेका थिए ।
उनले खेलको १०औँ मिनेटमा गरेको गोल नै नेपालको जितमा निर्णायक बन्यो ।
सुजलको यो तेस्रो अन्तर्राष्ट्रिय गोलसमेत हो ।
