मोरङका कृषकहरूले पालेका कुखुरामा बर्ड फ्लु रोग पुष्टि भएको छ ।
आइतबार प्रेस विज्ञप्ति जारी गर्दै कृषि तथा पशुपक्षी विकास मन्त्रालयअन्तर्गत रहेको पशु सेवा विभागले यसको पुष्टि गर्दै संक्रमण अन्यत्र फैलन नदिन विज्ञसहितको टोली परिचालित गरिएको बताएको छ ।
मोरङ जिल्लाको ग्रामथान र बुढीगङ्गा गाउँपालिकाका किसानले पालेका कुखुरामा रियल टाइम पिसिआर परिक्षण गर्दा बर्ड फ्लु (HPAI, H5N1) पुष्टि भएको विभागले जनाएको छ ।
रोग देखिएको क्षेत्रका एक हजार ६ सय ५० लेयर्स कुखुरा, ५० परेवा, चार हजार दुई सय अण्डा, एक हजार एक सय ५० के.जी. दाना र चार हजार अण्डाको क्रेट नष्ट गरिएको छ ।
घरमा, फार्ममा पालिएका कुखुरा वा अन्य पशुपक्षीमा कुनै पनि समस्या देखिए रोगको सघन निगरानी गर्न र रोग देखापरेको अवस्थामा तत्काल नियन्त्रणमा लिने कार्यका लागि सहयोग गरिदिन समेत विभागले किसानलाई आग्रह गरेको छ ।
